اسلام آباد (آئی این پی) عوامی مسلم لیگ کے سربراہ شیخ رشید احمد نے کہا ہے کہ سپریم کورٹ کرپشن کے راستے میں دیوار چین ہے، پانامہ کیس پر اگر انصاف نہ ہوا تو ملک میں خانہ جنگی شروع ہوجائیگی ،امید ہے عدالت سے انصاف کا علم بلند ہوگا،حکومت نے موٹر وے ، ایئرپورٹ اور پی ٹی وی کی عمارتوں کو گروی رکھ دیا ، ریڈیو کو بھی گروی رکھنے کی تیاریاں کی جا رہی ہیں۔ وہ پیر کو پانامہ کیس کی سماعت کے موقع پر عدالت عظمیٰ کے باہر میڈیا سے گفتگو کر رہے تھے۔
انہوں نے کہا کہ سپریم کورٹ میں تاریخی کیس زیر سماعت ہے، ہمیں پورا یقین ہے کہ سپریم کورٹ سے انصاف ملے گا۔ شیخ رشید احمد نے کہا کہ سپریم کورٹ کرپشن کے خلاف دیوار چین ہے، ہمیں امید ہے کہ سپریم کورٹ سے ہی انصاف کا علم بلند ہوگا ۔ انہوں نے کہا کہ نواز شریف حکومت نے موٹر وے ، ایئرپورٹ اور پی ٹی وی کی عمارتوں کو گروی رکھ دیا ، ریڈیو کو بھی گروی رکھنے کی تیاریاں کی جا رہی ہیں ،آج اگر کرپٹ لوگوں کو سزا نہ ملی تو ملک میں کرپشن کا راج ہوجائے گا ، شیخ رشید احمد نے ایک سوال کے جواب میں کہا کہ نواز شریف حکومت کو ٹرسٹی اور بینیفشری کے درمیان فرق معلوم نہیں اور وہ ان دونوں کے حوالے سے فیصلہ نہیں کر پا رہے لیکن ہمیں امید ہے کہ ہمیں اعلیٰ عدلیہ سے انصاف ملے گا اور کرپٹ حکومت اپنے انجام کو پہنچے گی،پانامہ کیس پر اگر انصاف نہ ہوا تو ملک میں خانہ جنگی شروع ہوجائیگی ۔
