اسلام آباد (مانیٹرنگ ڈیسک) وہ قومیں بہت عظیم ہوتی ہیں جو اپنے ہیروز ان سے منسلک بہادری کی داستانوں کو ہمیشہ اپنے دل میں بسا کر رکھتی ہیں کہ یہی چیز قوم کا اپنے ہیروز کیلئے خراج تحسین ہوتاہے ۔ تازہ ترین میڈیا رپورٹس کے مطابق محکمہ ایکسائز کی جانب سے وینٹی نمبر پلیٹس کا سلسلہ شروع کیاجا رہا ہے جس کے مطابق اب شہری نمبر پلیٹس پر اپنے نام کے ساتھ قومی ہیروز کی تصاویر لگوا سکیں گے، جون 2017 تک اس پر عملدرآمد شروع کر دیا جائے گا۔
سپیشل مانیٹرنگ یونٹ نے یونیورسل نمبر پلیٹ کے ساتھ وینٹی نمبر پلیٹ متعارف کرانے کا فیصلہ کیا، وینٹی نمبرپلیٹ پر گاڑیوں کے مالکان یا ذات کے ساتھ حکومت کی جانب سے دیئے گئے قومی ہیروز کی تصاویر لگوا سکیں گے۔سینئر ممبر سلمان صوفی کا کہنا ہے کہ وینٹی نمبر پلیٹس کیلئے سیمپل تیار کرلیے گئے ہیں تاہم تاحال حتمی منظوری نہیں دی گئی جبکہ نمبر پلیٹس کی قیمت کا بھی ابھی تعین نہیں کیا گیا، اس نمبر پلیٹ کے اجرا سے محکمہ ایکسائز کو چارارب سے زائد رقم کی آمدنی متوقع ہے۔