رات کا وقت تھا۔ حضرت ابراہیم ادھم رحمتہ اللہ علیہ اپنے تخت پر محو خواب تھے۔ محل کی چھت پر کسی کے چلنے پھرنے کی آوازیں آنے لگیں۔ ان کے دل میں خیال آیا کہ محل کی چھت پر چڑھ کر چہل قدمی کرنے کی جرات کسے ہو سکتی ہے۔ کوئی انسان ایسی جرات نہیں کر سکتا۔ عین ممکن ہے کوئی ہوائی چیزیں ہوں گی۔ لہذا انہوں نے دریافت کیا کہ محل کی چھت پر کون چہل قدمی کر رہا ہے اوپر سے آواز آئی کہ ہم مصروفِ تلاش ہیں۔ حضرت ادھم رحمتہ اللہ علیہ نے دریافت کیا کہ تمہیں کس چیز کی تلاش ہے۔ ان لوگوں نے جواب دیا کہ ہمارےا ونٹ گم ہو چکے ہیں اور ہم انہیں محل کی چھت پر تلاش کر رہے ہیں۔ حضرت ادھم رحمتہ اللہ علیہ نےفرمایا کہ تم عجیب تلاش میں مصروف ہو۔ کیا اونٹ کبھی محل کی چھت پر چڑھ سکتے ہیں جو تم انہیں محل کی چھت پر تلاش کر رہے ہو۔ انہوں نے جواب دیاکہ اگر اونٹ محل کی چھت پر نہیں مل سکتے تو خدا بھی تخت و تاج اور نرم گرم بستر پر نہیں مل سکتا۔ اس واقعہ کے بعد انہوں نے حکمرانی کو ٹھوکر ماردی اور عوام کی نظروں سے اوجھل ہو گئے اور یاد الٰہی میں مصروف ہو گئے۔