انقرہ (این این آئی) ترک صدر رجب طیب ایردوآن نے پارلیمنٹرینز برائے القدس لیگ کی پہلی کانفرنس کی میزبانی کا اعزاز استنبول کو حاصل ہونے پر خوشی کا اظہار کیا ہے ۔کانفرنس سے اپنے افتتاحی خطاب میں رجب طیب ایردوآن نے کہا کہ میں القدس کے برادر شہر استنبول سے دنیا کے تمام مظلوموں، بہادر فلسطینی جوانوں، رام اللہ، نابلس اور غزہ سمیت تمام فلسطینی شہروں کے باسیوں، فلسطینی خواتین، دوشیزاوں اور مسئلہ فلسطین کا دفاع کرنیوالے تمام فلسطینی مہاجرین کو ہدیہ تبریک پیش کرتا ہوں۔انہوں نے دوٹوک الفاظ میں کہاکہ القدس تینوں ادیان کا مرکز ہے تاہم مسجد اقصی، پہاڑی کا گنبد اور مسجد اقصی کا زیرین علاقہ صرف اور صرف مسلمانوں کیلئے ہے۔
انہوں نے یہ بات زور دیکر کہی کہ مسجد اقصی اور القدس کا تحفظ ہمارا دینی فریضہ ہے۔ انہوں نے کہا کہ فلسطینی گزشتہ نصف صدی سے زائد مدت سے فلسطین میں ہونیوالی خلاف ورزیاں سہ رہے ہیں۔ انہوں نے کہا کہ قبلہ اول میں اسرائیلی خلاف ورزیوں پر ہم خاموش نہیں رہیں گے۔انہوں نے کہا کہ کانفرنس کی میزبانی پر انتہائی مسرت ہو رہی ہے ۔الاقصی کا تحفظ اور اپنے پتھروں سے لڑنے والے بچوں اور القدس کا تحفظ ہم سب کی ذمہ داری ہے۔انہوں نے کہا کہ اس کانفرنس کی اہمیت نمایاں ہے اورپارلیمنٹرینز برائے القدس لیگ دنیا بھر میں پھیلے فلسطینیوں کیلئے طاقت کا مرکز ہے۔ طیب ایردوآن نے اپنے خطاب میں اقوام متحدہ کو کڑی تنقید کا نشانہ بناتے ہوئے کہا کہ اس میں دو رائے نہیں کہ مسئلہ فلسطین حقوق سلبی کا معاملہ ہے۔ اقوام متحدہ اس معاملے پر چپ سادھے ہوئے ہے، دنیا میں قانون کی حکمرانی کے بجائے حکمرانوں کا قانون رائج ہے۔