اسلام آباد(آئی این پی )پاکستان تحریک انصاف کے چیئرمین عمران خان نے کہا ہے کہ وزیراعظم نوازشریف پر یوسف رضاگیلانی سے زیادہ سنگین نوعیت کے الزامات ہیں،ہم کسی صورت نوازشریف کو وزیراعظم قبول نہیں کریں گے،سپریم کورٹ میں آج کی سماعت سے بہت مطمئن ہیں،ججز کے ریمارکس ہمارے لئے حوصلہ افزاء ہیں،قطر کے شہزادے کے خط پر بہت سی چیزیں سامنے آئیں گی،وزراء کا کام یہ نہیں کہ کرپشن کا دفاع کریں۔
وہ جمعرات کویہاں بنی گالہ میں میڈیا سے گفتگو کر رہے تھے۔انہوں نے کہاکہ پانامہ کیس کے بعد پاکستان کی تاریخ بدلے گی،یوسف رضاگیلانی پر توہین عدالت کا کیس تھا،نوازشریف پر زیادہ بڑا الزام ہے۔انہوں نے کہاکہ یہ شریف فیملی کا کیس ہے،وزراء سپریم کورٹ جاکر کس چیز کی وضاحت کر رہے ہیں،وزیرریلوے نے وہاں جا کر اس خاندان کا دفاع کیا،وزراء کا یہ کام نہیں کہ کرپشن کا دفاع کریں۔چیئرمین پی ٹی آئی نے کہاکہ پارلیمنٹ سے بائیکاٹ نوازشریف کا بائیکاٹ تھا،ترک صدر کا نہیں،نوازشریف کے قوم اور پارلیمنٹ سے خطاب میں تضاد ہے،ججز خود چاہتے ہیں کہ پانامہ کیس کا فیصلہ جلدی ہو،بڑی جدوجہد کے بعد اس مقام تک پہنچے ہیں،جج نے کہا کہ حکومت کے بیانات میں تضاد ہے۔انہوں نے کہاکہ ایک منتخب وزیراعلیٰ پر کیسے شیلنگ کی جاسکتی ہے،جمہوریت کیلئے لوگوں کو کیسے مارا جاسکتا ہے،قطر کے شیئرز کے خط پر ابھی بات شروع نہیں ہوئی،خط پر بہت سی چیزیں سامنے آئیں گی۔انہوں نے کہاکہ وہ اپنے بچوں سے ملنے کیلئے لندن جارہے ہیں
انہوں نے کہاکہ تحریک انصاف ترک صدرطیب اردگان کااحترام کرتی ہے اورترکی کے عوام پاکستانی عوام کے بھائی ہیں ۔عمران خان نے کہاکہ ترک صدرکے خطاب کابائیکاٹ کرنے کاسوچ بھی نہیں سکتے بلکہ ہماری جماعت نے تونوازشریف کے پارلیمنٹ میں آنےپربائیکاٹ کیاہے ۔
