سفر میں ایک طفیلی ایک شخص کے ساتھ ہو لیا۔ اس نے طفیلی سے کہا ذرا بازار جا کر ہمارے لئے گوشت خرید لاؤ اس نے کہا نہیں واللہ میں اس پر قادر نہیں تو وہ خود جا کر لے آیا۔ پھر اس نے کہا اٹھ پکا لے تو اس نے جواب دیا کہ مجھ سے ٹھیک نہیں پکے گا تو اس نے خود پکا لیا پھر اس نے اس سے کہا اٹھ کر اس کا ثرید بنا لے تو جواب دیا واللہ میں تو بہت سست ہو رہا ہوں

تو اس شخص نے خود ہی ثرید بھی بنا لیا پھر اس نے کہا کہ اس کو پیالوں میں اتار لے تو بولا مجھے یہ ڈر ہے کہ کوئی چمچہ میرے کپڑوں پر نہ الٹ جائے تو اس شخص نے خود ہی پیالوں میں اتارا پھر اس نے کہا اب اٹھ کر کھا تو لے۔ تو طفیلی نے کہا اب تو مجھے شرم آ ہی گئی کہاں تک تیری بات سے انکار ہی کرتا رہوں اور اٹھ کر کھانے لگا۔