اسلام آباد(مانیٹرنگ ڈیسک) وزیراعظم پاکستان میاں محمد نواز شریف آج جمعہ کو سانگلہ موٹروے انٹرچینج کا افتتاح کریں گے۔ اس منصوبہ پر چالیس کروڑ کے قریب لاگت آئی ہے۔ یہ منصوبہ تقریباً دو سال قبل پارلیمنٹ اسلام آباد کے اجلاس میں متفقہ طور پر منظور کیا گیا تھا۔ اسکی افتتاحی تقریب کی صدارت وفاقی وزیر امور کشمیر چوہدری محمد برجیس طاہر کریں گے۔

جن کی پرزور سفارش پر یہ منصوبہ وزیراعظم پاکستان میاں محمد نواز شریف نے منظور کیا تھا۔ سانگلہ موٹروے انٹرچینج سانگلہ ہل جو کہ ایم تھری پر پنڈی بھٹیاں سے 15کلومیٹر ، ساہیانوالہ انٹرچینج سے14کلومیٹر، فیصل آباد سے30کلومیٹر اور موٹروے پوائنٹ نیو کراچی سے4کلومیٹر کے فاصلہ پر بنایا گیا ہے۔ اس انٹرچینج سے فیصل آباد، حافظ آباد، چنیوٹ ، ننکانہ صاحب اور شیخوپورہ کی حدود میں واقع رہائشی اور سانگلہ ہل اور اسکے گردو نواح میں واقع سینکڑوں دیہات کے عوام موٹروے کی سفری سہولت سے فائدہ اٹھا سکیں گے اور اس انٹرچینج سے صرف پندرہ منٹ میں اپنی گاڑی پر سانگلہ ہل سٹی میں پہنچائے جا سکے گا۔ اور مسافروں

کی حفاظت کے لئے انٹرچینج اور سانگلہ ہل کے درمیان تین پولیس چیک پوسٹیں قائم کی گئی ہیں۔ اس انٹرچینج سے ننکانہ صاحب تک جانے کے لئے ایک ارب سنتالیس کروڑ روپے کی لاگت سے دو رویہ سڑک بھی تعمیر کی جائے گی۔ جس کی تعمیر اس افتتاح کے ساتھ ہی شروع کر دی جائیگی۔ اس سڑک پر تین اوورہیڈ برج بھی بنائے جائیں گے۔ اس افتتاح کے ساتھ سانگلہ ہل کا نام بھی موٹروے ریکارڈ میں درج ہو جائے گا۔ اس تقریب کے لئے میاں محمد نواز شریف کے ہیلی کاپٹر کے لئے تین مختلف ہیلی پیڈ بنائے گئے ہیں عوام اس انٹرچینج سے لاہور، اسلام آباد پشاور اور فیصل آباد جا سکیں گے۔