اسلام آباد(آئی این پی)پاکستان پیپلزپارٹی کے رہنما سینیٹرسعید غنی نے کہا ہے کہ نواز شریف اور عمران خان کا آپس میں مک مکا بے نقاب ہو چکا ہے۔ دونوں کی سوچ اور دونوں کا استاد ایک ہے۔منگل کو اپنے ایک بیان میں سینیٹر سعید غنی نے کہا کہ عمران خان نے ہمیشہ حزب اختلاف کو نقصان پہنچایا۔ اب ایک بار پھر نواز شریف کے اقتدار کو کندھا دے رہے ہیں۔
انہوں نے کہا کہ نیازی صاحب کی وجہ سے پنجاب میں مسلم لیگ (ن) کو زیادہ نشستیں ملیں۔ سینیٹر سعید غنی نے کہا کہ حزب اختلاف میں شامل جماعتوں کا اتحاد رہتا اور حزب اختلاف کے ٹی آآرز کے حوالے سے نواز حکومت کو ٹف ٹائم دیا جاتا مگر عمران خان سولو فلائٹ کر کے نواز شریف کے مددگار بن گئے۔ سینیٹر سعید غنی نے کہا کہ ہم اپنے اس موقف سے ہرگز نہیں ہٹیں گے کہ نواز شریف چیئرمین بلاول بھٹو زرداری کے چار مطالبے تسلیم کرے۔
