پاراچنار (این این آئی)فورسز نے افغان سرحد پر خود کش حملہ آور کو کرم ایجنسی میں داخل ہونے سے روک کر تباہی پھیلانے کی کوشش ناکام بنادی ،خود کش حملے میں ایک سکیورٹی اہلکار سمیت دو افراد زخمی ہوگئے۔پولیٹکل انتظامیہ اور فورسز کے مطابق محرم الحرام کے حوالے سے افغان سرحد چار روز تک بند رکھنے کے بعد جمعہ کو معمول کے مطابق دوبارہ کھلاتو دوپہر بارہ بجے ایک خود کش حملہ آور افغانستان کے صوبہ پکتیا کے سرحدی علاقے سے کرم ایجنسی کے خرلاچی سرحد پر پہنچ گیا ،کرم ایجنسی میں داخل ہونے کی کوشش پر فورسز کے جوان بتی گل کو حملہ آور پر شک ہوا اور اسے رکنے کا اشارہ کیا مگر حملہ آور نے پاکستانی گیٹ میں اندر داخل ہونے کی کوشش کی جس پر فورسز کے جوان نے حملہ آور کو پیچھے دھکیل دیا جس پر حملہ آور نے خود کو دھماکے سے اڑالیا ،دھماکے سے ایف سی کا اہلکار بتی گل اور راہگیر کامل حسین شدید زخمی ہوگئے اور پاکستانی گیٹ اور کئی گاڑیوں کے شیشے ٹوٹ گئے۔ پاک آرمی 73 بریگیڈ کے کمانڈر بریگیڈئیر ملک امیر محمد خان ، کماندنٹ کرم ملیشیاء کرنل عمر ملک ، پولیٹیکل ایجنٹ اکرم اللہ اور دیگر حکام افغان سرحد پر پہنچ گئے اور جائے وقوعہ کا معائنہ کرکے افغان سرحد سیل کردی۔ میڈیا سے بات چیت کرتے ہوئے حکام نے بتایا کہ انسپکٹر جنرل فرنیئرکور میجر جنرل مظہر شاہین نے جرات اور بہاردی کا مظاہرہ کرنے والے ایف سی اہلکار کو پچاس ہزار روپے نقد انعام دینے اور فوری طور پر عمرہ پر بھیجنے کا اعلان کیا ہے جبکہ ایم این اے کرم ایجنسی ساجد طوری اور پولیٹیکل انتظامیہ نے بھی ایف سی اہلکار کو پچاس ،پچاس ہزار روپے نقد انعام دینے کا اعلان کیا ہے۔ زخمی اہلکار کو علاج کیلئے سی ایم ایچ ٹل اور زخمی کامل حسین کو ایجنسی ہیڈ کوارٹر ہسپتال پاراچنار پہنچا دیا گیا ہے ایم این اے ساجد طوری اور سینیٹر سجاد حسین نے خود کش حملے کی کوشش ناکام بنانے پر فورسز اور آرمی چیف جنرل راحیل شریف کو مبارکباد دی ہے ۔