اسلام آباد(مانیٹرنگ ڈیسک) پاک بھارت کشیدگی ہر آنے والے نئے دن کے ساتھ بڑھتی جا رہی ہے ۔ بھارت کی الزام تراشیاں بھی جا ری ہیں اور ساتھ ہی ساتھ پاکستانی سرحد کے ساتھ چھیڑ چھاڑ بھی ۔لائن آف کنٹرول کی خلاف ورزی کرنا بھارت کا روز کا معمول بنتا جا رہا ہے ۔ بھارت اپنے اوپر ہونے والے ہر حملے کا ذمے دار پاکستان کو ٹھہراتا ہے ۔ذرائع کے مطابق بھارت میں اُڑی حملے کی تحقیقات کے دوران بھارتی حکام نے بریگیڈ کمانڈر کو ہٹا دیا۔ بھارتی میڈیا کے مطابق بریگیڈ کمانڈر تحقیقات مکمل ہونے تک اپنے عہدے پر کام نہیں کریں گے۔کرنل یشپال کو اُڑی سیکٹر کا بریگیڈ کمانڈر لگا دیا گیا ہے۔ یاد رہے کہ اُڑی سیکٹر پر حملے کے چند گھنٹوں‌بعد ہی بھارت نے بنا تحقیقات کے الزام پاکستان پر لگا دیا تھا۔ لیکن ابھی بریگیڈ کمانڈر کو ہٹائے جانے کے بعد ظاہر ہو رہا ہے کہ اُڑی سیکٹر حملہ اندورنی سازش بھی ہو سکتی ہے۔
دوسری جانب بھمبر، آزاد کشمیر میں لائن آف کنٹرول پر بھارتی فوج کی جانب سے ایک بار پھر جارجیت کی گئی ہے جس کا پاک فوج کی جانب سے کرارا جواب دیا گیا ہے۔ذرائع کے مطابق چھمب سیکٹر پر بھارتی فوج نے بلااشتعال فائرنگ کی ہے اور فائرنگ کا یہ سلسلہ 2گھنٹے تک جاری رہا، تاہم پاک فوج کی جانب سے بھرپور جوابی کارروائی کی گئی ہے ۔ذرائع کا بتانا ہے کہ بھارتی جارحیت سول آبادی پر کی گئی ہے مگر ابھی تک کسی قسم کے جانی نقصان کی اطلاعات نہیں ہیں ۔

موضوعات:اڑی حملہ پاک بھارت کشیدگی