لاہور( این این آئی)تحریک انصاف سنٹرل پنجاب کے صدر عبدالعلیم خان نے کہا ہے کہ پلڈاٹ اور دیگر سروے پاکستان کی بدترین جمہوریت بے نقاب کر رہے ہیں جہاں دن بدن حکومت پر عوام کی طر ف سے عدم اعتماد میں اضافہ ہو رہا ہے اور صورتحال بہتری کی طرف جانے کی بجائے خراب ہو رہی ہے انہوں نے کہا کہ ان حالات میں 2018تک بھی لوڈ شیڈنگ سمیت کوئی مسئلہ حل نہیں ہو گا عبدالعلیم خان نے پارٹی رہنماؤں کے مشاورتی اجلا س سے خطاب کرتے ہوئے کہا کہ کس قدر افسوسناک امر ہے کہ عالمی یوم جمہوریت پر پاکستان کی رینکنگ بدترین جمہوری ممالک میں شمار ہو رہی ہے جہاں جمہوریت کے نام پر خاندانی بادشاہت قائم کر رکھی ہے اور 3برس گزرنے کے باوجود ساری وزارتیں اپنی فیملی سے باہر نہیں جانے دی گئیں اسی طرح انتخابی عمل میں پائی جانے والی خرابیوں کو دور کرنے کیلئے کوئی عملی قدم نہیں اٹھایا گیا عبدالعلیم خان نے کہا کہ اسی بدترین جمہوریت کے باعث عوام کی طرف سے حکومت کی حمایت میں کمی واقع ہوئی ہے اور وہ اپنے مسائل کے حل کیلئے فوج کی طرف دیکھنے پر مجبور ہیں انہوں نے کہا کہ بڑے بڑے نعرے لگانے اور تجربہ کار ٹیم رکھنے کا دعوی کرنے والوں کا یہ سروے منہ چڑا رہے ہیں جو گڈ گورننس کا دعوی کرنے والوں کیلئے لمحہ فکریہ ہے ۔دریں اثنا ء رائیونڈ مارچ و جلسے کے حوالے سے عبدالعلیم خان نے پارٹی رہنماؤں کے مشاورتی اجلاس کی صدارت کرتے ہوئے کہا کہ عوام بالخصوص زندہ دلان لاہور شدت کے ساتھ عمران خان کے اعلان کے منتظر ہیں اورپارٹی اجلاس میں دعوی کیاگیاکہ انشا ء اللہ سابق تمام ریکارڈ توڑ کر لوگوں کی بڑی تعداد رائیونڈ پہنچے گی اجلاس میں فیصلہ کیا گیا کہ اس مارچ کے حوالے سے پارٹی کے تمام شعبوں کو متحرک کیا جائے گا اور سنٹرل پنجاب کے تمام اضلاع بھرپور نمائندگی کریں گے اجلاس میں ایم پی اے شعیب صدیقی و پارٹی رہنماؤں جمشید اقبال چیمہ ، خواجہ جمشید امام ،میاں یامین ٹیپو اور عبدالکریم کلواڑ نے بھی رائیونڈ مارچ کے حوالے سے اظہار خیال کیا ۔