اسلام آباد (مانیٹرنگ ڈیسک)پاکستان مسلم لیگ (ن) کے مرکزی رہنما سینیٹر مشاہد اللہ خان نے کہا ہے کہ شیخ رشید تاریخ اور ٹائم دینے کے عادی ہیں، کسی ویگن سٹینڈ پر کھڑے ہو جائیں ،کام اچھا چلے گا ،عمران خان لندن میں مسلمانوں کے مقابلے میں یہودی کی انتخابی مہم میں شریک ہوئے ،عمران خان قوم کا وقت برباد کررہے ہیں۔جمعہ کو پارلیمنٹ ہاؤس کے باہر میڈیا سے بات چیت کرتے ہوئے سینیٹر مشاہد اللہ نے کہا کہ عمران خان قوم کا وقت برباد کرتے ہیں انہیں خود بھی معلوم نہیں ہوتا کہ وہ کونسا بیان کس موقع پر دے رہے ہیں، لندن میں مسلمان کے مقابلے میں یہودی کی انتخابی مہم میں شریک ہوتے ہیں ، اسلام کے ساتھ اتنا ہی تعلق ہے۔ انہوں نے ایک سوال پر کہا کہ شیخ رشید تاریخ اور ٹائم دینے کا عادی ہے کسی ویگن سٹینڈ پر کھڑا ہو جائے اور آوازیں لگائیں تو کام اچھا چلے گا۔