اسلام آباد (آئی این پی)یوم آزادی کے موقع پر وفاقی دارالحکومت میں سیکورٹی کو ہائی الرٹ کرتے ہوئے ریڈ زون کو کنٹینرز لگا کر سیل کر دیا گیا ، جناح کنونشن سنٹر میں پرچم کشائی کی مرکزی تقریب کی سیکورٹی کیلئے ایک ہزار اہلکار تعینات ہونگے، دہشت گردی کے خطرات کے باعث انٹرنیٹ اورموبائل فون سروس آج صبح 6 سے دوپہر 2 بجے تک بند رہے گی۔کسی بھی ہنگامی صورتحال سے نمٹنے کیلئے پاک فوج کے دستوں کو الرٹ کر دیا گیا۔ تفصیلات کے مطابق یوم آزادی کے موقع پر دہشت گردی کے ممکنہ خطرات کے باعث اسلام آباد میں سیکورٹی کے انتہائی سخت انتظامات کیے گئے ہیں، ریڈ زون کی طرف جانے والے تمام راستوں کو کنٹینرز لگا کر سیل کر دیا گیا ہے جبکہ شہر کے داخلی اور خارجی راستوں پر چیکنگ کو سخت کرتے ہوئے اضافی نفری تعینات کی گئی ہے، یوم آزادی کی مرکزی تقریب (آج ) اتوار کوجناح کنونشن سنٹر میں ہوگی، اس تقریب کی سیکورٹی کیلئے پولیس ، رینجرز اور ایف سی کے جوان تعینات ہونگے۔ ذرائع کیمطابق ضلعی انتظامیہ کی درخواست پر اسلام آباد اور راولپنڈی کے بعض علاقوں میں صبح 6 بجے سے دوپہر 12 بجے تک موبائل فون سروس بند رہے گی، دوسری طرف کسی بھی ہنگامی صورتحال سے نمٹنے کیلئے پاک فوج کے دستوں کو بھی الرٹ کر دیا گیا ہے۔