کراچی(این این آئی)وزیراعلیٰ سندھ سید مراد علی شاہ نے کراچی میں زیر علاج سانحہ کوئٹہ کے زخمیوں کے علاج ومعالجہ کے اخراجات اٹھانے کا اعلان کرتے ہوئے کہاہے کہ ملک بھر میں دہشت گردوں کا جینا حرام کردیں گے۔منگل کووزیراعلی سندھ سید مراد علی شاہ نے آغا خان اسپتال میں سانحہ کوئٹہ کے زخمیوں کی عیادت اور ان کی جلد صحتیابی کے لئے دعا کی اور سانحہ پر گہرے دکھ اور افسوس کا اظہار کیا۔وزیراعلیٰ سندھ نے ڈاکٹروں سے مریضوں کی صحت کے بارے میں پوچھا ۔ وزیراعلی سندھ نے زخمیوں سے بات چیت کرتے ہوئے کہاکہ آپ یہاں مہمان ہیں،علاج کے تمام اخراجات حکومت برداشت کرے گی۔ انہوں نے کہاکہ بلوچ قوم نے دہشت گردی کے خلاف بے پناہ قربانیاں دی ہیں،سندھ کی عوام بلوچ بھائیوں کے ساتھ ہیں۔انہوں نے کہاکہ دہشت گرد جہاں بھی ہوں،ان کا جینا حرام کردیں گے۔ایک زخمی نے وزیر اعلی سے کہا کہ اس نے انہیں ٹی وی پر دیکھا تھا،جس پرمراد علی شاہ مسکرا دیئے اور کہا آپ خواب میں منظور وسان کو بھی دیکھا کریں،کیوں کہ وہ اکثر خواب میں دکھائی دیتے ہیں۔ وزیراعلی کے ہمراہ صوبائی وزراء منظوروسان، ڈاکٹرسکندر میندھرو، مشیرقانون مرتضی وہاب اور ڈی سی ایسٹ آصف جان ودیگر بھی موجود تھے۔واضح رہے کہ آغاخان اسپتال میں 27 زخمی زیر علاج ہیں ان میں سے تین کی حالت تشویشناک ہے ۔ سانحہ کوئٹہ کے 29 زخمیوں کوپاک فضائیہ کے خصوصی طیارے سے کراچی لایا گیا اور انہیں آغا خان اسپتال میں داخل کیا گیا ۔ ان زخمیوں میں ایک خاتون شامل ہیں ۔ زخمیوں کو میڈیکل ، سرجیکل اور انتہا ئی نگہداشت کے وارڈز میں رکھا گیا ہے ۔ آغا خان اسپتال میں 27 زخمی زیر علاج ہیں جن کی عمریں 20 سے 50 سال کے درمیان ہیں ان میں سے تین کی حالت تشویشناک بتائی جاتی ہے ۔