کراچی (این این آئی)پی آئی اے اور سر ی لنکن ائر لائنز کے درمیان3 ائر بس A-330 طیاروں کی ویٹ لیز پر حصول کا معاہدہ طے پا گیا۔ ترجمان پی آئی اے کے مطابق آج کولمبو میں منعقدہ تقریب میں پی آئی اے کے چیف ایگزیکٹو آفیسر برنڈ ہلڈن برانڈ اور سری لنکن ائر لائنز کے چیئر مین اجیت ڈیاس اور چیف ایگزیکٹو آفیسر کیپٹن سورن رتوتی نے دستخط کئے۔ معاہدہ دونوں ایئر لائنوں کے درمیان تفصیلی گفتوشنید کے بعد طے پایا۔ اس معاہدے کے تحت پہلا طیارہ اگلے ہفتے پی آئی اے کو مل جائے گا جبکہ باقی طیارے آنے والے مہینوں میں پی آئی اے کے فضائی بیڑے میں شامل ہو جائیں گے۔ یہ نئے طیارے بہترین حالت میں ہیں اور ان کو پی آئی اے کی پریمئرسروس پروازوں کیلئے استعمال کیا جائے گا جس سے پی آئی اے کو اپنا مارکیٹ شیئر بہتر بنانے میں مدد ملے گی۔ترجمان نے بتایا کہ پی آئی اے پریمئر سروس کا آغاز سب سے پہلے لندن کیلئے پروازوں سے کرے گی جو کہ 14 اگست سے شروع کی جارہی ہے۔ پریمئر سروس کیلئے لاہور اور اسلام آباد سے ہفتہ وار تین تین پروازیں چلائی جائیں گی اور مزید طیاروں کی شمولیت کے بعد پریمئر سروس کا دائرہ کار دوسرے بین الاقوامی مقامات کیلئے بھی بڑھا دیا جائے گا۔ پی آئی اے کے چیئر مین اعظم سہگل نے ان طیاروں کے حصول کیلئے ہلڈن برانڈ کی سربراہی پر مشتمل ٹیم کی کارکردگی کو سراہا ہے۔