اسلام آباد (مانیٹرنگ ڈیسک)کنٹرول لائن کی دونوں جانب رہائش پذیر کشمیری منگل کو یوم الحاق پاکستان منائیں گے۔ ہر سال دنیا بھر سمیت پاکستان میں مقیم کشمیری اس دن کو پورے جوش و جذبہ کے ساتھ مناتے ہیں اور اس عزم کا اظہار کرتے ہیں کہ آزادی کی جدوجہد جاری رہے گی۔ 19 جولائی 1947ء کو سری نگر میں غازی ملت سردار محمد ابراہیم خان کی رہائش گاہ پر آل جموں و کشمیر مسلم کانفرنس نے ایک تاریخی قرارداد پاس کی تھی جس میں تقسیم ہند کے منصوبہ اور دو قومی نظریہ کے تحت کشمیر کے پاکستان کے ساتھ الحاق کا مطالبہ کیا گیا تھا۔ اس دن کی مناسبت سے دنیا بھر سمیت آزاد کشمیر اور پاکستان کے مختلف شہروں میں خصوصی سیمینارز اور پروگرامز منعقد کئے جائیں گے۔ دن کا آغاز مساجد میں کشمیر کی آزادی کیلئے خصوصی دعاؤں سے ہو گا جبکہ بدھ کو مقبوضہ کشمیر میں بھارتی افواج کے تشدد اور ظلم کے خلاف لائن آف کنٹرول کے آر پار مقیم اور دنیا بھر میں بسنے والے کشمیری یوم سیاہ منائیں گے۔یہ فیصلہ وزیراعظم محمد نواز شریف کی زیر صدارت وفاقی کابینہ کے اجلاس میں کیا گیا تھا۔یاد رہے کہ مقبوضہ کشمیر میں بھارتی فورسز کے ہاتھوں برہانی وانی کی شہادت کے بعد بھارتی بربریت کے نتیجے میں 50کے قریب معصوم کشمیریوں کو شہید کیا جاچکا ہے۔