لاہور (این این آئی )صوبائی وزیر قانون و پارلیمانی امور رانا ثناء اللہ خاں نے خیبر پختونخواہ حکومت کی جانب سے جامعہ حقانیہ کو 30کروڑ روپے کی خطیر رقم دینے کے معاملے کو نیشنل ایکشن پلان کو کمزور کرنے کی سازش قرار دیتے ہوئے کہا ہے کہ جامعہ حقانیہ تحریک طالبان کے تمام گروہوں کی مادر علمی ہے ، اس کی اتنی بھاری مالی امداد کر کے عمران خان نے خود کو طالبان خان ثابت کر دیا ہے ، او ایس ڈی بنائے گئے پو لیس اہلکاروں کو احتجاج کا حق حاصل ہے لیکن وہ کسی تشدد پر نہ اتریں ۔ ان خیالات کااظہار انہوں نے اسپیکر قومی اسمبلی سردار ایاز صادق سے پنجاب اسمبلی میں ملاقات کے بعد میڈیا سے گفتگو کرتے ہوئے کیا ۔ صوبائی وزیر رانا ثناء اللہ نے کہا کہ سندھ میں آؤٹ آف ٹرن ترقیاں ہوئیں جہاں یہ معاملہ سندھ ہائیکورٹ میں گیا ، وہاں سے ہوتا ہوا سپریم کو رٹ پہنچ گیا ، کافی عرصہ سماعت کے بعد سپریم کو رٹ نے آؤٹ آف ٹرن ترقیوں کو غیر قانونی قرار دے دیا جس کے بعد اس کا اطلاق تمام صوبوں پر کر دیا گیا ، پنجاب میں 99.9فیصد تقرریاں درست ہو ئی ہیں ، اس قانون سے 9 سے 10ہزار پو لیس کے ملازمین متاثر ہوئے ہیں ، سپریم کو رٹ کا شعبہ قانون اس سارے معاملے کاجائزہ لے رہا ہے ، ہما ری کو شش ہو گی کہ جن ملازمین کو100فیصد میرٹ پر ترقیاں ملی ہیں ان کا مستقبل محفوظ بنا یا جائے تاکہ وہ مزید پر عزم ہو کر کام کر سکیں ، امید ہے کہ ہم ایسی صورتحال نکالنے میں کامیاب ہو جائیں گے جس سے ان کو ان کا حق ملے ، حکومت پوری طرح سے فرائض ادا کر رہی ہے ، آئی جی پنجاب آن بورڈ ہیں ، ان کو اپنے حق کیلئے آواز اٹھانے کا حق حاصل ہے ، عدالت میں بھی جا سکتے ہیں لیکن ان کا یہ احتجاج پر تشدد نہیں ہونا چاہیے ۔ ایک سوال کے جواب میں انہوں نے کہا کہ سانحہ ماڈل ٹاؤن کے متاثرین کو انصاف دلانے کیلئے جو کردار وزیر اعظم محمد نواز شریف نے ادا کیا وہ پو ری قوم کے سامنے ہے اور جو پاکستان عوامی تحریک کی جانب سے استغاثہ دائر کیا گیا ہے وہ بھی پو ری قوم کے سامنے ہے ، حقائق اور استغاثے میں زمین آسمان کا فرق ہے ، طاہر القادری نے یہ کہہ کر سراسر جھوٹ بولا ہے کہ سانحہ ماڈل ٹاؤن کی ایف آئی آر آرمی چیف کے کہنے پر درج ہوئی ، آرمی چیف اس ملک کے سپہ سالار ہیں ، وہ ملک و قوم کے مضبو ط مستقبل کیلئے اہم ترین ذمہ داریا ں نبھا رہے ہیں ، ضرب عضب کی قیادت بھی کر رہے ہیں ، ان کو قادری صاحب کی جانب سے اس طرح کے معاملات میں ملوث کیا جانا ایک سازش ہے ۔ ایک سوال کے جواب میں رانا ثناء اللہ نے کہا کہ اس بات میں کوئی شک نہیں کہ کے پی کے حکومت کی جانب سے جامعہ حقانیہ کو 30کروڑ روپے کی خطیر رقم دینا نیشنل ایکشن پلان کو کمزور کرنے کی ایک سازش ہے ، جامعہ حقانیہ تحریک طالبان کے تمام گروہوں کی مادر علمی ہے ، اس کی اتنی بھاری مالی امداد کر کے عمران خان نے خود کو طالبان خان ثابت کر دیا ہے ۔