نئی دہلی(مانیٹرنگ ڈیسک) بھارتی حکومت نے چین سے درخواست کی ہے کہ دونوں ممالک کے باہمی تعلقات بڑھانے کے لیے ضروری ہے کہ چین اس کے ’ مفادات‘ کا خیال رکھے۔بھارتی ٹی وی کے مطابق وزارت خارجہ کے ترجمان وکاس سوارپ کاایک ٹوئیٹر پیغام میں کہنا تھا کہ ہم چین پر یہ واضح کرتے رہیں گے کہ باہمی مفادات ، ترجیحات اور خدشات کے معاملات حل کرنے اور آگے بڑھنے کے کا عمل باہمی روابط کے لیے ناگزیر ہے۔ ترجمان نے کہا کہ اگرچہ نیوکلیئر سپلائرز گروپ ( این ایس جی) کے سیؤل کے اجلاس میں بھارت کو متوقع نتائج نہ ملے لیکن اس کے باوجود بھارت اور چین کے تعلقات پر اثر نہیں پڑے گا۔سفارتی ذرائع کے مطابق این ایس جی کا آئندہ اجلاس میکسکو میں ہوگا اور بھارت دوبارہ اس کی رکنیت کے لیے درخواست کرے گا۔حال ہی میں نیوکلیئر سپلائر گروپ ( این ایس جی) کی رکنیت حاصل کرنے میں ناکامی پر بھارتی سرکاری حلقے شدید رنج وملال کا شکار ہیں اور اس کی وجہ چین کو قرار دیتے ہیں جس نے این ایس جی میں بھارتی شمولیت کی آخر دم تک مخالفت کی یہاں تک کہ درجنوں ممالک کے سامنے چین تنہا رہ گیا لیکن اپنے مؤقف سے پیچھے نہیں ہٹا۔