اسلام آباد(مانیٹرنگ ڈیسک)وزیر اعظم نواز شریف کی صاحبزادی مریم نواز کو اہم ذمہ داریاں سونپے جانے کا امکان، ذرائع کے مطابق وزیراعظم کی عدم موجودگی میں مریم نواز نے خوش اسلوبی سے سیاسی امور نمٹائے ہیں اور اپوزیشن کی جانب سے مریم نواز کی سرگرمیوں پر کی جانے والی تنقید کے پیش نظر انہیں سرکاری سطح پر اہم ذمہ داری دی جائے گی۔ مریم نواز آئندہ چند دنوں میں آزاد جموں و کشمیر قانون ساز اسمبلی کے انتخابات کے حوالے سے جلسوں سے بھی خطاب کریں گی۔ مریم نواز عیدالفطر کے بعد سیاسی سرگرمیوں میں بھرپور حصہ لیں گی۔
وزیراعظم محمد نواز شریف نے مریم نواز کو لندن آنے سے روک دیا ہے اور کہا ہے ان کو جو ٹاسک دیا ہے وہ اسے پورا کریں۔ ذرائع کے مطابق وزیراعظم محمد نواز شریف نے مریم نواز کو اپنا ’’سیاسی جانشین‘‘ بنانے کا فیصلہ کرلیا ہے اس سلسلے میں انہیں عوامی جلسوں سے خطاب کی اجازت بھی دے دی گئی ہے۔ وہ خواتین کی بجائے مردوں اور خواتین کے مشترکہ جلسوں سے خطاب کرینگے وہ اپنی سرگرمیاں خواتین تک محدود نہیں کرنا چاہتیں۔ انہوں نے پورے ملک میں مسلم لیگی رہنماؤں اور کارکنوں سے براہ راست رابطے قائم کرنے کا فیصلہ کیا ہے۔