تاشقند( مانیٹرنگ ڈیسک)صدر مملکت ممنون حسین نے کہا ہے کہ شنگھائی تعاون تنظیم کے مکمل رکن کی حیثیت سے پاکستان اس تنظیم کے ساتھ اپنے روابط مزید مضبوط بنائے گا،علاقائی امن و استحکام اور ترقی کے ساتھ ساتھ دہشت گردی اور انتہاپسندی کے خلاف بھی اپنا کردار بھر پور طریقے سے ادا کرتا رہے گا کیونکہ یہ تنظیم یوایشیا میں جغرافیائی سیاست میں مثبت تبدیلی کا بڑا ذریعہ ثابت ہوگی۔ صدر مملکت ممنون حسین نے تاشقند میں شنگھائی تعاون تنظیم کے سربراہی اجلاس میں اپنے خطاب کے دوران کہا کہ اس تنظیم کے پسِ پشت جذبے شنگھائی اسپرٹ کے تحت رکن ممالک سے اپنے تعلقات کو مزید فروغ دے گا۔انھوں نے کہا کہ پاکستان کے شنگھائی تعاون تنظیم کے رکن ممالک کے ساتھ انتہائی گہرے تاریخی و ثقافتی روابط کے علاوہ مضبوط اقتصادی اور اسٹریٹجیک تعلقات ہیں جس سے ظاہر ہوتا ہے کہ ہمارے مفادات اور دلچسپیوں میں بڑے پیمانے پر ہم آہنگی پائی جاتا ہے۔
ہم سمجھتے ہیں کہ اقتصادی ترقی کے ضمن میں ہمارے عوام کا خواب اس وقت شرمندہ تعبیر نہیں ہوسکتا جب علاقائی امن و استحکام کو لاحق خطرات کے خاتمے کے لیے بھرپور طریقے سے کام نہ کیا جائے۔صدر مملکت نے کہا کہ شنگھائی تعاون تنظیم پاکستان کو جنوبی ایشیا،افغانستان اور خطے کے دیگر حصوں میں امن و سلامتی کے فروغ کے لیے مفید پلیٹ فارم فراہم کرتی ہے جو علاقائی استحکام اور معاشی ترقی کی بنیاد ہے۔اس سلسلے میں افغانستان میں امن ناگزیر ہے۔صدرمملکت نے کہا کہ پاکستان کو ان دنوں دہشت گردی کے قبیح چیلنج کا سامنا ہے جس سے نمٹنے کے لیے ہم دہشت گردی کا خاتمہ اور اپنی سرحدوں کی سیکیورٹی کو یقینی بنانا چاہتے ہیں۔انھوں نے کہاکہ پاکستان نے دہشت گردی ،انتہا پسندی اور علیحدگی پسند عناصر سے جنگ میں عظیم قربانیاں دی ہیں ،اس سلسلے میں جب بھی ضرورت پیش آئی پاکستان نے بدی کی ان قوتوں کے خلاف بھرپور عزم کے ساتھ طاقت استعمال کی اور پاکستان اب بھی دہشت گردی کی ہر شکل کے خلاف جنگ کے لیے پْرعزم ہے۔
انھوں نے کہا کہ سیکیورٹی فورسز کی جانب سے آپریشن ضرب عضب کے تحت دہشت گردی کے خلاف بلا امتیاز کارروائی کی جارہی ہے۔ ہم نے اس لڑائی میں غیر معمولی کامیابیاں حاصل کر کے جنگ کا پانسہ پلٹ دیا ہے۔اس آپریشن کے تحت دہشت گردی کے ڈھانچے کو مکمل تباہ کر دیا گیا ہے اور دہشت گردوں کا صفایا کر دیا گیا ہے۔صدرمملکت نے کہا کہ پاک چین اقتصادی راہداری کی تعمیر کا کام زور و شور سے جاری ہے جو شنگھائی تعاون تنظیم کے رکن ممالک کو بحرہ عرب اور جنوبی ایشیا تک رسائی کا ایک فطری ذریعہ فراہم کرے گی۔انھوں نے کہا کہ پاکستان کی بھرپور تائید و حمایت کرنے پر تمام رکن ممالک کا ایک بار پھر شکریہ ادا کرتا ہوں۔ قبل ازیں صدر مملکت ممنون حسین جب شنگھائی تعاون تنظیم کے 16ویں سربراہ اجلاس میں شرکت کے لئے پہنچے تو انہوں نے ایس سی او کے رکن ممالک کے سربراہان مملکت و حکومت سے مصافحہ کیا۔ تقریب میں روس کے صدر ولادیمیرپوٹن‘ بھارتی وزیراعظم نریندر مودی‘ ازبکستان کے صدر اسلام کریموف‘ تاجکستان کے صدر امام علی رحمان‘ ترکمانستان کے صدر قربان علی بردی محمدوف‘ قزاقستان کے صدر نور سلطان نذر بائیوف اور کرغزستان کے صدر الماس بیگ اتم بائیوف بھی شریک تھے۔