اسلام آباد(آئی این پی ) پیپلزپارٹی کے سینئر رہنما اورقومی اسمبلی میں قائد حزب اختلاف سید خورشید شاہ نے کہا ہے کہ وزیراعظم نوازشریف پانامالیکس پر بچ نہیں سکتے ،اپوزیشن تمام معاملات کو بات چیت سے حل کرنا چاہتی ہے،سپریم کورٹ نے حکومتی ٹی او آرز کو مسترد کیا،میاں نوازشریف7سوالوں کے جواب دے دیتے تو معاملات حل ہوجاتے، آصف زرداری اور بلاول بھٹو ایک پیج پر ہیں، پاکستان کی کوئی خارجہ پالیسی نہیں ، ہم دنیا میں تنہا ہو رہے ہیں ۔وہ بدھ کو نجی ٹی وی کوانٹرویو دے رہے تھے۔انہوں نے کہا کہ اپوزیشن معاملات کو بات چیت سے حل کرنا چاہتی ہے،سیاست میں آگے بڑھنا اورپیچھے ہٹنا پڑتاہے۔خورشید شاہ نے کہا کہ سپریم کورٹ نے حکومتی ٹی اوآرز کو مسترد کردیاتھا،اپوزیشن نے9جماعتوں کے ساتھ مل کر ٹی او آرز بناتے ہیں،میاں صاحب نے7سوالوں کو70بنادیا ہے اگروہ7سوالوں کے جواب دے دیتے تو معاملات حل ہوجاتے۔پانامالیکس کے معاملے پر میاں صاحب بچ نہیں سکتے وہ نظر اندازکرینگے تو مشکل ہوجائے گی۔انہوں نے کہا کہ وزیراعظم نے فیصلے نہ کئے تو کوئی اورکرے گا اور اپوزیشن سڑکوں پر آئے گی،ہمیں کسی کے پیچھے نہیں آگے جانا ہے،سڑکوں پر آنے کافیصلہ پارٹی اجلاس میں کیا جائے گا۔ وزیراعظم اپوزیشن کو اعتماد میں لیکر فیصلہ کریں اوراپوزیشن چاہتی ہے کہ پارلیمنٹ اپنا کردار اداکرتی رہے۔خورشید شاہ نے کہا کہ آصف زرداری اور بلاول بھٹو ایک پیج پر ہیں ۔ خارجہ پالیسی سے متعلق سوال کے جواب میں انہوں نے کہا کہ پاکستان کی کوئی خارجہ پالیسی نہیں ہے ہم دنیا میں تنہا ہو رہے ہیں ۔ تاریخ میں کبھی پاکستان کی اتنی کمزور خارجہ پالیسی نہیں رہی جتنی آج ہے ۔ خورشید شاہ نے کہا کہ پاکستان کی دفاع کی بھی کوئی پالیسی نہیں ہے اور تمام ہمسایہ ممالک کے ساتھ تعلقات بگڑتے جارہے ہیں ،ہمیں اپنی پالیسیوں کو درست کرنا ہوگا ورنہ پچھتانے کے سوا ہمارے پاس نہیں رہے گا۔