اسلام آباد (این این آئی)وزیراعظم کے معاون خصوصی برائے خارجہ امور سید طارق فاطمی نے کہا ہے کہ عالمی سطح پر تیزی سے تبدیلیاں آ رہی ہیں پاکستان چیلنجز کا سامنا کرنے کیلئے مکمل تیار ہے ۔ایک انٹرویو میں انہوں نے کہا کہ عالمی سطح پر ہونے والی تبدیلیوں کا پاکستان گہرائی سے جائزہ لے رہا ہے اور چیلنجز سے نمٹنے کیلئے مکمل تیار ہے۔ ایک سوال کے جواب میں انہوں نے کہا کہ ہم افغانستان میں اشرف غنی حکومت کی مکمل سپورٹ کر رہے ہیں تاہم افغان حکومت کے ساتھ بارڈر مینجمنٹ، سرحدوں پر مشتبہ افراد کی سرگرمیوں کو روکنے کیلئے چیک پوسٹوں کے امور پر باہمی تعاون کی ضرورت ہے۔ انہوں نے کہا کہ کئی سالوں سے پاکستان میں مقیم افغان مہاجرین کی واپسی کیلئے عالمی برادری کو پاکستان کی مدد کرنی ہوگی کیونکہ یہ معاملہ پاکستان میں امن و امان کی صورتحال سے منسلک ہے۔ افغان مہاجرین کے مسائل حل کرنے میں پاکستان ہر قسم کی مدد کیلئے تیار ہے۔ انہوں نے کہا کہ ہم نے امریکہ کو کہہ دیا تھا کہ افغانستان میں طاقت کے استعمال سے مسائل حل نہیں ہو رہے اس لئے مذاکرات کا راستہ اختیار کیا جائے۔ انہوں نے کہا کہ افغان امن عمل کو آگے بڑھانے کیلئے پاکستان بھرپور کردار ادا کر رہا تھا تاہم حالیہ ڈرون حملے نے امن عمل پر منفی اثرات مرتب کئے۔ بھارت کے ساتھ تعلقات کے حوالے سے سید طارق فاطمی نے کہا کہ ہم سچائی اور نیک نیتی کے ساتھ تمام ہمسایہ ممالک کے ساتھ امن عمل کیلئے کوششیں کرتے رہے ہیں مگر ان کی جانب سے مثبت ردعمل نہیں آ رہا، یہ کوئی ون وے ٹریفک نہیں۔ انہوں نے کہا کہ ہم تنازعہ کشمیر سمیت تمام کور ایشوز پر جامع مذاکرات چاہتے ہیں۔ بھارت کے ایک حاضر سروس فوجی افسر کو بلوچستان میں دہشتگردی کے سیل سے گرفتار کیا گیا، جس سے ثابت ہو گیا ہے کہ بھارت پاکستان میں دہشتگردانہ سرگرمیوں میں ملوث ہے۔