اسلام آباد(خصوصی رپورٹ) اسلام آباد کے چڑیا گھر میں لوگوں کا دل بہلانے والے ہاتھی ’’کاون‘‘ کے دل کی مراد پوری ہو گئی، اگلے ماہ کی یکم تاریخ تک ’’کاون‘‘ کیلئے ہتھنی چڑیا گھر میں منگوا لی جائے گی۔چڑیا گھر میں کاون کی دیکھ بھال کے ذمہ دار مہاوت ’’جلال‘‘نے سماء ٹی وی سے گفتگو کرتے ہوئے کہا کہ چند روز قبل مریم نواز نے اسلام آباد چڑیا گھر کا دورہ کیا تھا جس میں انہوں نے ہاتھی کاون کیلئے ہتھنی منگوانے کا اعلان کیا تھا۔ مہاوت جلال نے بتایا کہ مریم نواز کے حکم پر یکم جولائی تک کاون کیلئے ہتھنی چڑیا گھر پہنچ جائے گی جس کے استقبال کیلئے بھرپور طریقے سے تیاریاں کی جا رہی ہیں۔مہاوت جلال نے بتایا کہ کاون کی ’’ہتھنی‘‘ کیلئے سوئمنگ پول کی صفائی کرکے اس میں تازہ پانی بھی چھوڑ دیا گیا ہے۔ واضح رہے کہ 8 ،10 ماہ قبل ہاتھی کاون کی ’’ہتھنی‘‘ بوجہ بیماری مر گئی تھی جس کے بعد کاون نے اداس رہنا شروع کر دیا تھا۔