اسلام آباد (این این آئی)پاکستان میں موجود رجسٹرڈ افغان مہاجرین کے قیام کی مدت میں مزید توسیع کا فیصلہ کر لیا گیا ٗرواں ہفتے توسیع کی سمری وزیراعظم کو ارسال کی جائے گی۔ جس میں رجسٹرڈ افغان مہاجرین کے قیام کی مدت میں مزید ڈیڑھ سال کی توسیع کی سفارش کی گئی ۔ذرائع کے مطابق اقوام متحدہ کے ہائی کمشنر برائے مہاجرین کی طرف سے پاکستان پر افغان مہاجرین کے قیام کی مدت میں توسیع کے لئے مسلسل دباؤڈالا جا رہا ہے جس کے باعث وزرات سیفران نے رجسٹرڈ افغان مہاجرین کے قیام کی مدت میں مزید ڈیڑھ سال کی توسیع کا فیصلہ کیا اور اس کی منظوری وزیراعظم نواز شریف سے لی جائے گی۔ذرائع نے دعویٰ کیا کہ وزرات سیفران نے افغان مہاجرین کی قیام کی مدت بڑھانے کی سمری تیار کرلی ہے، جو رواں ہفتہ وزیراعظم آفس کو ارسال کردی جائے گی۔ وزارت سیفران کے مطابق افغان مہاجرین کے قیام کی مدت میں توسیع کی سمری 2ماہ قبل وفاقی کابینہ کے اجلاس کیلئے ارسال کی گئی تھی،لیکن کابینہ کا اجلاس نہ ہونے کے باعث یہ سمری زیر غور نہ آسکی اب براہ راست وزیراعظم آفس کو سمری ارسال کی جائے گی۔واضح رہے کہ افغان مہاجرین پاکستان میں قیام کی مدت 30جون کو ختم ہوجائے گی، اس وقت ملک میں موجود رجسٹرڈ افغان مہاجرین کی تعداد 15لاکھ ہے۔