کراچی(این این آئی)کراچی کے علاقے نارتھ ناظم آباد میں مسجدعثمان غنی کے آہنی شیڈ گرنے سے زخمی ہونے والے افراد نے رپورٹ درج کرانے سے انکار کردیاہے۔ زخمیوں کا کہنا ہے حادثہ اتفاقیہ تھا، اس میں کسی کی کوئی غلطی نہیں ہے۔جمعہ کو کراچی کے علاقے نارتھ ناظم آباد لنڈی کوتل میں مسجدعثمان غنی کے آہنی شیڈگرنے سے چھ افراد شہید ہوگئے تھے۔ پولیس کے مطابق حادثے میں زخمی ہونے والے افراد نے پولیس رپورٹ درج کرانے سے انکار کردیا ہے، جبکہ چار زخمیوں نے پولیس کو اپنا بیان ریکارڈ کروادیا۔زخمیوں کا کہنا ہے کہ آہنی شیڈ گرنے کا واقعہ نمازجمعہ کی ادائیگی کے بعد تیز ہوا کے چلنے کے باعث پیش آیا، اس وقت نمازی نوافل ادا کررہے تھے ، تاہم یہ ایک اتفاقیہ حادثہ تھا اس میں کسی کی کوئی غلطی نہیں، جبکہ واقعے کی کوئی رپورٹ درج نہیں کرانا چاہتے۔