کراچی(این این آئی)بیرون ملک مقیم پاکستانیوں نے مالی سال 16 کے ابتدائی گیارہ مہینوں (جولائی تا مئی)کے دوران 17841.63 ملین امریکی ڈالر وطن بھجوائے جس سے مالی سال2015-16 کے اسی عرصے میں بھجوائی گئی رقم 16898.32 ملین ڈالر کے مقابلے میں 5.6فیصد کی نمو ظاہر ہوتی ہے۔مئی 2016 کے دوران کارکنوں کی ترسیلات زر کی مالیت1799.39 ملین ڈالر تھی جو اپریل 2016 کے مقابلے میں 8.6فیصد زیادہ اور مئی 2015 کے مقابلے میں 8.2فیصد زائد ہے۔ بلحاظ ملک مئی 2016 کی تفصیلات سے پتہ چلتا ہے کہ سعودی عرب، متحدہ عرب امارات، امریکہ، برطانیہ، خلیج تعاون کونسل کے ملکوں(بشمول بحرین، کویت، قطر اور عمان) اور یورپی یونین کے ملکوں سے بالترتیب 547.77 ملین ڈالر،380.74 ملین ڈالر، 202.1 ملین ڈالر، 240.58 ملین ڈالر، 216.71 ملین ڈالر، اور 41.64 ملین ڈالر پاکستان بھجوائے گئے جبکہ مئی 2015 میں ان ملکوں سے آنے والی رقوم بالترتیب 528.35 ملین ڈالر، 399.49 ملین ڈالر، 221.12 ملین ڈالر، 194.17 ملین ڈالر، 190.66 ملین ڈالر اور 28.5 ملین ڈالر تھیں۔ مئی 2016 کے دوران ناروے، سوئٹزر لینڈ، آسٹریلیا، کینیڈا، جاپان اور دیگر ملکوں سے آنے والی ترسیلات زر مجموعی طور پر 170ملین ڈالر رہیں جبکہ مئی 2015 میں ان ملکوں سے 101.03 ملین ڈالر موصول ہوئے تھے۔