اسلام آباد(آن لائن) آئندہ بجٹ میں ارکان پارلیمنٹ پر کروڑوں کی نوازشات کا امکان ہے،پارلیمنٹ کے اخراجات میں 80 سے 90 کروڑ روپے تک اضافہ کیا جا رہا ہے، ارکان پارلیمنٹ کی تنخواہوں، اسپیکر، ڈپٹی اسپیکر اور اپوزیشن لیڈر آفسز کیلئے فنڈز بھی بڑھ جائیں گے۔ذرائع کے مطابق بجٹ میں پارلیمنٹ کے اخراجات میں 87 کروڑ روپے کا اضافہ تجویز کیا گیا ہے۔ قومی اسمبلی کے بجٹ میں 60 کروڑ، سینیٹ کے بجٹ میں 27 کروڑ روپے کا اضافہ کیا جا سکتا ہے۔ ارکان قومی اسمبلی کی تنخواہوں کیلئے فنڈز بڑھا کر ایک ارب 25 کروڑ روپے، سینیٹرز کی تنخواہوں کیلئے 34 کروڑ مختص کرنے کی تجویز ہے۔اندر کی خبر یہ بھی ہے کہ اسپیکر آفس کیلئے چار کروڑ، ڈپٹی اسپیکر کے فنڈز میں 70 لاکھ روپے کا اضافہ متوقع ہے۔ اپوزیشن لیڈر آفس کا بجٹ بڑھا کر 1 کروڑ 50 لاکھ کرنے کی تجویز ہے۔ مولانا فضل الرحمان کی سربراہی والی کشمیر کمیٹی کیلئے بھی 6 کروڑ سے زیادہ مختص کئے جائیں گے۔