اسلام آباد (این این آئی)پاکستان نے قدرتی آفات سے پیدا ہونے والی صورتحال پر قابو پانے کیلئے ملکی سطح پر موثرمیکنزم تیار کرلیا ہے یہ بات وفاقی وزیر عبد القادر بلوچ نے ترکی میں انسانی ہمدردی کی بنیاد پر امداد سے متعلق کانفرنس سے خطاب کرہوئے بتائی ۔وزیر سیفران نے کہا کہ پاکستان ملکی سطح پر قدرتی آفات سے پیدا ہونے والی صورتحال سے نمٹنے کی بھرپور صلاحیت رکھتا ہے اور اس مقصد کیلئے ایک میکنزم تیار کر رکھا ہے۔انہوں نے موسمیاتی تبدیلی کے منفی اثرات سے نمٹنے کیلئے پاکستان کے عزم کا بھی اظہار کیا اور اس کے لئے مناسب فنڈز کی دستیابی کی ضرورت پر زور دیا ۔وزیر سیفران نے کہا کہ بار بار بڑے پیمانے پر قدرتی آفات کے خطرات کا سامنا کرتے ہوئے حکومت پاکستان نے ملکی سطح پے قدرتی آفات کی صورتحال سے نمٹنے کے جوابی میکنزم کو مستحکم کر لیا ہے۔عبدالقادر بلوچ نے کہا کہ قدرتی آفات اور بحرانوں کی صورت میں پاکستان انسانی جانیں بچانے اور مقامی معیشتوں کانقصان کم سے کم کرنے کی غرض سے عالمی کوششوں کابھر پور ساتھ دیگا۔اس دو روزہ گول میز مباحثے میں پاکستان سمیت روس،فرانس،ترکی ،آسٹریلیا،فلپائن،نیوزی لینڈ،فجی،ہنڈوراس،میکسیکو،موزمبیق اور انڈونیشیا کے وفود نے حصہ لیا۔سمٹ کے دوران دیگرسرگرمیوں کے علاوہ وزیر سیفران نے ’’ضرورت مندوں تک رسائی؛ پاکستان کے تجربات‘‘ سے متعلق این ڈی ایم اے کے اجلاس کی صدارت کی۔اجلاس سے ریزیڈنٹ کوارڈینیٹر نیل بھونی،یو این ایچ سء آر پاکستان کی نمائندہ اندریکہ رٹوٹی،جیندر سٹڈیز قائد اعظم یونیورسٹی کی سربراہ فرزانہ باری،جوائنٹ سیکرٹری سیفران احمد کمال اورسابق سیکرٹری دفاع نے اظہار خیال کیا۔وفاقی وزیر نے اس موقع پراین ڈی ایم اے کی نمائش اور نادرا کے سٹال کا بھی دورہ کیا۔