لاہور ( نیوزڈیسک)محکمہ تعلیم پنجاب نے ایلیٹ نجی تعلیمی اداروں کی فیسوں میں سالانہ 8 فیصد اضافے کی تجویز منظور کر لی، فیسوں میں مجوزہ اضافے کی سفارشات باقاعدہ منظوری کے لئے وزیراعلی پنجاب کو بھیجی جائیں گی۔یہ بات صوبائی وزیر تعلیم رانا مشہود احمد خاں نے یہاں پرائیویٹ تعلیمی اداروں کے مالکان کے ایک اجلاس کی صدارت کرتے ہوئے بتائی۔اجلاس میں ای ڈی ایجوکیشن لاہور پرویز اختر،ڈپٹی سیکرٹری سکول ایجوکیشن رانا حسن اختر اور ایلیٹ پرائیویٹ تعلیمی اداروں کے گروپس کے نمائندوںنے شرکت کی۔اجلاس سے خطاب کرتے ہوئے رانا مشہود احمد خاں نے کہا کہ محکمہ تعلیم نے نجی تعلیمی اداروں کی فیسوں میں 2016 کے تعلیمی سال سے سالانہ آٹھ فیصد اضافے کی حتمی تجویز تیار کر لی ہے۔اگر کوئی ادارہ سمجھتا ہے کہ وہ آٹھ فیصد سے زیادہ فیس وصول کرنے کا حقدار ہے تو اسے اس امر کی متعلقہ ضلعی رجسٹریشن اتھارٹی سے اجازت لینا ہو گی۔انہوں نے کہا کہ متعلقہ ضلعی رجسٹریشن اتھارٹی مقررہ شرح سے زیادہ اضافے کے کیس کا فیصلہ 20 دنوں میں کرنے کی پابند ہو گی جبکہ فیس میں مقررہ شرح سے زیادہ اضافے کے خواہشمند نجی تعلیمی ادارے کو اپنا موقف منوانے کے لئے قابل قبول دلائل پیش کرنا ہوں گے۔انہوں نے کہا کہ 4 ہزار روپے سے کم فیس والے نجی تعلیمی اداروں پر 8 فیصد اضافے کی شرح کا قانون لاگو نہیں ہو گا تاہم وہ بھی اپنی فیسیں بڑھانے کے لئے متعلقہ ضلعی رجسٹریشن اتھارٹی کی منظوری لینے کی پابند ہوں گے۔رانا مشہود احمد خاں نے کہا کہ نجی تعلیمی اداروں کی فیسوں میں آٹھ فیصد سالانہ اضافے کے قانون کو پہلے سے موجود قانون میں ترمیمی بل کی صورت میں اسمبلی میں پیش کیا جائے گا اور اسمبلی کا اجلاس بلانے میں تاخیر کی صورت میں اس قانون کو آرڈیننس کی صورت میں بھی نافذالعمل کیا جا سکتا ہے۔