لاہور (نیوز ڈ یسک ) دبنگ طریقے
سے چھاپہ مارنے والی عائشہ ممتاز کے بارے میں خبریں گردش کر رہی ہیں کہ جلد ہی ان کا تبادلہ کسی دوسرے مقام پر کر دیا جائےگا۔ غیر معیاری کھانے فروخت کرنے والوں کے خلاف جنگ جاری رکھنے والی پنجاب فوڈ اتھارٹی کی ڈائریکٹر آپریشن عائشہ ممتاز کا اتھارٹی سے تبادلہ کروانے کے لئے ریسٹورنٹ مالکان سمیت لاہور کے ایک اعلیٰ بیوروکریٹ اور وفاقی وزیر سرگرم ہوگئے ہیں۔ نجی اخبار کے مطابق گلبرگ کے علاقہ میں موجود ایک بڑے ریسٹورنٹ کو غیر معیاری اشیاءاستعمال کرنے اور گندگی کی بنا پر پنجاب فوڈ اتھارٹی کی ڈائریکٹر آپریشن نے سیل کیا۔حالیہ ہی ایک ریسٹورنٹ کے مالک نے لاہور کے ایک اعلیٰ بیوروکریٹ سے رشتے داری سنا کر ریسٹورنٹ سیل نہ کرنے کا کہا جبکہ معاملہ حل نہ ہوسکا تو اعلیٰ بیوروکریٹ نے ڈائریکٹر آپریشن کو فون پر سیل نہ کرنے کا کہا مگر اس کے باوجود پنجاب فوڈ اتھارٹی کی ڈائریکٹر آپریشن نے لبرٹی کے علاقہ میں موجود ریسٹورنٹ سیل کردیا، جس پر لاہور کے اعلیٰ بیوروکریٹ اور عائشہ ممتاز میں ٹھن گئی۔اخبارکے مطابق لاہور لبرٹی میں موجود ریسٹورنٹ کے مالک کی اعلیٰ بیوروکریٹ کے ساتھ قریبی رشتہ داری ہے جبکہ ان کے دوستون میں وفاقی وزیر بھی ہیں۔