اسلام آباد(نیوز ڈیسک) محکمہ موسمیات نے کراچی شہر میں اپریل کے مہینے میں شدید گرمی پڑنے کا خدشہ ظاہر کیا ہے۔محکمہ موسمیات کا یہ بھی کہنا ہے کہ شمال مشرقی بلوچستان میں بھی کل چند مقامات پر بارش کا امکان ہے جب کہ بارش کے موجودہ سلسلوں کا اثر کراچی میں پڑنے کا کوئی امکان نہیں ہے۔ کراچی میں اپریل کے مہینے میں شدید گرمی پڑنے کا خدشہ ہے جب کہ کراچی سمیت سندھ کے بعض علاقوں میں درجہ حرارت 40 ڈگری سینٹی گریڈ تک پہنچنے کا امکان ہے۔نجی ٹی وی کے مطابق شدید گرمی کی پیش گوئیوں کے پیش نظر ایدھی ویلفیئر نے ایڈوانس میں تین سو قبروں کی کھدائی مکمل کرلی ہے۔ ایدھی کے ذرائع کے بتایا کہ جون اور جولائی میں کراچی میں شدید ترین گرمی پڑنے کاخدشہ ہے اللہ نہ کرے کہ اس گرمی کی وجہ سے ہلاکتیں ہوں مگر ماضی میں پیش آنے والی صورتحال کے پیش نظر ایدھی نے تین سو قبروں کی کھدائی کا کام مکمل کرلیا ہے اور جو افرادقبروں کے اخراجات ادا نہیں کرسکیںگے ان کی میتوں کو بغیر کسی معاوضے کے دفن کیاجائے گا۔