کراچی (نیوز ڈیسک) بھارتی خفیہ ایجنسی را کے افسر کل بھوشن یادیو کے ویڈیو بیان کے بعد کراچی کا کاؤنٹر ٹیررازم ڈیپارٹمنٹ ایکشن میں آ گیا۔ کراچی سینٹرل جیل میں قید را کے ایجنٹوں سے ایک مرتبہ پھر تفتیش کا فیصلہ کرلیا گیا۔بھارتی خفیہ ایجنسی را کے افسر کل بھوشن یادیو کے انکشافات کے بعد کراچی سینٹرل جیل میں قید “را” ایجنٹوں سے ایک مرتبہ پھر تفتیش کا فیصلہ کر لیا گیا ہے۔ تفتیش کاؤنٹر ٹیررازم ڈیپارٹمنٹ کے سینئر افسران پر مشتمل گروپ کرے گا۔ پہلے مرحلے میں را کے پانچ ایجنٹوں سے تفتیش کا فیصلہ کیا گیا ہے۔ ذرائع کاؤنٹر ٹیررازم ڈیپارٹمنٹ کے مطابق ندیم انکل اور شفیق نے تفتیش میں “را” کا ایجنٹ ہونے کا اعتراف کیا ہے۔ندیم انکل واٹر بورڈ کا ملازم ہے اور بھارتی شہر فرید پور سے دہشت گردی کی تربیت لے چکا ہے۔ را ایجنٹ ظفر عرف ٹینشن سے بھی جیل میں تفتیش کی جائے گی۔ ذرائع کے مطابق کراچی سے گرفتار را کے ایجنٹوں کی تعداد 7 سے زائد ہے جو بینکاک کے راستے بھارت جانے کا بھی انکشاف کر چکے ہیں۔