لاہور(نیوز ڈیسک) عوامی مسلم لیگ کے سربراہ شیخ رشید احمد نے کہا ہے کہ پاک فوج ہر اس دیوار کو روند دے گی جو پاک چین اقتصادی راہداری میں رکاوٹ بنے گی۔اپنے ٹوئٹر پیغام میں شیخ رشید نے کہا کہ بھارتی جاسوس کی گرفتاری پاکستانی فورسز کی بڑی کامیابی ہے جس پر پوری قوم پرجوش ہے تاہم اس معاملے پر وزیر اعظم کی خاموشی عوام کے جذبات کی نفی ہے۔ انہوں نے کہا کہ قوم کو بہادر اور ولولہ انگیز قیادت کی ضرورت ہے۔ یہ وقت پاکستانی بن کر سوچنے کا ہے۔ خاموش کپتان ملک کی بدنامی کا باعث بن رہے ہیں۔شیخ رشید احمد نے کہا کہ ہمارے پاس بہت قابل انجینئرز ہیں جو ایٹم بم تک بنا سکتے ہیں مگر شوگر ملوں کے لئے ہمیں کیابھارتی ہی چاہئیں؟، بھارتی شہریوں کو نوکریاں دینے والوں کو شرم آنی چاہیے ۔ انہوں نے کہا کہ کرکٹر وزیر اعظم کو یہ سوچنا چاہیے کہ کرکٹ صرف گیارہ کھلاڑی نہیں ہمارے بیس کروڑ عوام کا کھیل ہے۔