اسلام آباد (نیوز ڈیسک) نیشنل ڈیزاسٹر مینجمنٹ اتھارٹی (این ڈی ایم اے) نے ملک میں بارشوں کے نئے سلسلے کے پیش نظر ممکنہ ہنگامی صورتحال سے نمٹنے کیلئے ہدایات جاری کر دی ہیں ۔ ذرائع کے مطابق ڈیزاسٹر مینجمنٹ کی صوبائی اتھارٹیزکو ہدایت کی گئی کہ ریسکیو اور ریلیف کے تمام اداروں کو الرٹ کیا جائے اور جانی و مالی نقصانات سے بچاؤ کے لئے انتظامات کئے جائیں ٗمتعلقہ علاقوں کی آبادیوں کی آگاہی کے لئے ایس ایم ایس الرٹ جاری کئے جائیں۔ این ڈی ایم اے کی جانب سے جاری ہدایات میں کہا گیا کہ بارشوں کے علاقوں میں پلوں، مواصلاتی ڈھانچے، آبی گذر گاہوں، لینڈ سلائیڈنگ کے علاقوں اور کچے مکانات کی نگرانی کی جائے۔ علاوہ ازیں ضلعی، تحصیل اور یونین کونسل کی سطح پر امدادی سامان کی دستیابی اور متعلقہ اداروں کے ساتھ روابط قائم رکھنے کی بھی ہدایت کی گئی ہے۔