اسلام آباد(نیوز ڈیسک) وزارتِ داخلہ نے سرفراز مرچنٹ کی جانب سے ایم کیو ایم اور اسکی قیادت پر لگائے گئے الزامات کی تحقیقات کیلئے انکوائری ایف آئی اے کے سپرد کر دی۔ انکوائری ٹیم منی لانڈرنگ، ہتھیاروں کی غیر قانونی خرید اور را کی جانب سے ایم کیو ایم کی فنڈنگ کے الزامات کی تفصیلی چھان بین کریگی۔ ذرائع کے مطابق کمیٹی نے سرفراز مرچنٹ کو اپنا بیان ریکارڈ کرانے اور متعلقہ شواہد فراہم کرنے کیلئے کمیٹی کے سامنے پیش ہونے کا سمن جاری کر دیا۔ وزارتِ داخلہ نے تمام سکیورٹی و انٹیلی جنس اداروں کو بھی انکوائری سے متعلقہ کسی بھی ثبوت یا معلومات موجود ہونے پرانکوائری کمیٹی کے ساتھ شیئرکرنے کے لئے مراسلہ جاری کر دیا۔ کمیٹی کی رپورٹ آنے کے بعد یہ فیصلہ کیا جائے گا کہ حکومت ِ برطانیہ کے ساتھ کس سطح پر یہ مسئلہ اٹھایا جائے۔جنگ رپورٹ طاہر خلیل کے مطابق سرفراز مرچنٹ سے کہا گیا ہے کہ وہ کمیٹی کے سامنے اپنا بیان ریکارڈ کرائیں۔ اگر وہ پاکستان نہ آئے تو ایف آئی اے کی ٹیم برطانیہ جاکر ان کا بیان ریکارڈ کرے گی۔