لاہور(نیوزڈیسک ) لاہورشہر میں برائلر کی رسد میں کمی کے باعث مرغی کا گوشت 11 روپے فی کلو مہنگا ہوگیا، تاہم فارمی انڈوں کی قیمت میں چار روپے فی درجن کمی دیکھی گئی۔ تفصیلات کے مطابق گزشتہ روز لاہورشہر میں برائلر کی رسد میں کمی کے باعث قیمت میں اضافہ ریکارڈ کیا گیا۔ زندہ برائلر 8روپے اضافے کے بعد 112 روپے جبکہ مرغی کا گوشت 11 روپے اضافے کے بعد 162روپے فی کلو میں فروخت کیا گیا۔دوسری طرف موسم میں تبدیلی کے ساتھ ہی فارمی انڈوں کی قیمت میں کمی دیکھی گئی، فارمی انڈے 4 روپے کمی کے بعد 77 روپے فی درجن میں فروخت کیے گئے۔