لاہور (نیوز ڈیسک)لاہور ہائیکورٹ نے لاہور کے متوقع میئر خواجہ احمد حسان کی نااہلی کے لیے دائر درخواست پر 31مارچ کے لئے نوٹس جاری کردیئے ۔ لاہور ہائیکورٹ کے جسٹس شاہد کریم نے تحریک انصاف کے رہنما زبیر نیازی کی درخواست پر سماعت کی ۔ شیراز ذکا ایڈووکیٹ کے توسط سے دائر درخواست میں خواجہ احمد حسان چیئرمین یونین کونسل بننے کی اہلیت کو چیلنج کیا گیا ۔ درخواست میں موقف اپنایا گیا کہ پنجاب لوکل گورنمنٹ ایکٹ کی دفعہ 27کے تحت کوئی بھی سرکاری افسر یا سرکاری عہدے پر رہنے والا شخص ریٹائرمنٹ یا استعفیٰ کے دو سال تک بلدیاتی الیکشن میں حصہ نہیں لے سکتا لیکن خواجہ احمد حسان لاہور ویسٹ مینجمنٹ کمپنی سمیت مختلف سرکاری اداروں میں بڑے عہدوں پر فائز رہے اور تمام مراعات لیتے رہے تاہم خواجہ احمد حسان نے دو برس کی معیاد مکمل ہونے سے قبل ہی بلدیاتی الیکشن میں حصہ لیا اور الیکشن کمیشن نے ان کی یو سی 107سے کامیابی کا نوٹیفکیشن بھی جاری کر دیا ہے ۔ لہٰذا معزز عدالت سے استدعا ہے کہ خواجہ احمد حسان نے دو برس کی میعاد مکمل ہونے سے قبل ہی انتخاب لڑا اس لئے ان کو نااہل قرار دیا جائے ۔ لاہور ہائیکورٹ نے درخواست پر ابتدائی سماعت کے بعد 31مارچ کے لیے نوٹس جاری کر دیئے ۔ ابتدائی سماعت کے بعد عدالت نے خواجہ احمد حسان اور الیکشن کمیشن کو نوٹسز جاری کرتے ہوئے 31مارچ تک تفصیلی جواب طلب کر لیا۔