سرگودھا(نیوز ڈیسک)سرگودھا میں دہشت گردی کے لئے اسلحہ اسمگل کرنے کی کوشش ناکام بنادی گئی ،موٹر وے کے ذریعے چیکنگ کے دوران کار سے اسلحہ کی بڑی کھیپ برآمد کرلی گئی ، خیبر پختونخوا کے علاقے نوشہر ہ سے تعلق رکھنے والے 2اسلحہ کے اسمگلر گرفتار کر لئے گئے۔ڈی پی او سرگودھا سجاد حسن منج نے پولیس لائن میں ہنگامی پر یس کانفرنس کرتے ہوئے بتایا کہ کار میں موٹروے کے ذریعے اسلحہ کی بڑی کھیپ پشاور سے سرگودھا میں دہشت گردی کے غرض سے لائی جارہی تھی موٹروے سالم انٹر چینج کے ذریعے چیکنگ کے دوران انہیں حراست میں لے لیا گیا۔کار کے خفیہ خانوں سے 12رپیٹرگن ،28پمپ ایکشن گن،40بندوقیں، 21ہزار سے زائد گولیاں برآمد کرلی گئیں۔ڈی پی او سجاد حسن منج کے مطابق گرفتار کئے گئے دونوں اسلحہ کے اسمگلر وں اختر نواز اور فضل کریم کا تعلق خیبرپختونخوا کے علاقے نوشہر ہ سے ہے اور اسمگل کیا گیا اسلحہ سرگودھا میں دہشت گردی کے لئے استعمال کیا جانا تھا۔