کراچی(نیوزڈیسک)پی آئی اے ملازمین کی ہڑتال کے بعددوسری ائر لائنز نے کرایوں میں تین گنا اضافہ کر دیاہے۔وفاقی وزیر شاہد خاقان عباسی جن کی اپنی ایک نجی ایئر لائنز ’ایئر بلیو‘کے نام سے کام کررہی ہے بھی خوب پیسے کمارہی ہے۔اے آر وائی نیوز کے مطابق دوسری ائر لائنز نے کراچی سے اسلام آباد کا کرایہ ساڑھے آٹھ ہزار سے 27ہزار روپے کر دیا گیا جبکہ کراچی سے لاہور کا کرایہ بھی 27ہزار روپے کر دیا گیا ہے۔ اس کے علاوہ دیگر روٹس پر بھی کرایوں میں کئی گنا اضافہ کر دیا گیا ہے۔واضح رہے کہ پی آئی اے کی مجوزہ نجکاری کے خلاف ملازمین احتجاج کر رہے ہیں۔یاد رہے کہ پی آئی اے کے بعد پاکستان میں ایئر بلیو اورشاہین ایئرویز دو مشہور نجی کمپنیاں کام کررہی ہیں اور پی آئی اے ملازمین کی ہڑتال کی وجہ سے نجی کمپنیاں مجبور مسافروں سے خوب مال سمیٹ رہی ہیں۔