پشاور(نیوزڈیسک)حکومت خیبر پختونخوا نے مالی سال 2015-16کے دوران اخراجات جاریہ میں کمی لانے کی غرض سے سرکاری دفاتر میں کفایت شعاری کے لئے مزید اقدامات اٹھانے کی ہدایت کی ہے ۔ تفصیلات کے مطابق کفایت شعاری کے سلسلے میں صوبائی فنڈز سے فائیو سٹار ہوٹلوں میں سیمینار اور ورکشاپس کے انعقاد پر مکمل پابندی ہو گی جبکہ تمام سرکاری دفاتر ، اداروں اور کالجوں ماسوائے ہسپتالوں میں الیکٹرک ہیٹروں اور گیزروں کی خریداور استعمال پر بھی پابندی ہو گی ۔ دفتروں /اداروں میں موجودہ الیکٹرک ہیٹروں کو ضابطہ کی کارروائی مکمل کرنے کے بعد نمٹانے کے لئے متعلقہ محکمہ ، ملحقہ محکمہ یا ادارہ کے سربراہ کے پاس جمع کیا جائے ۔ اس کے علاوہ دیر سے ادائیگی کی وجہ بے جا اخراجات کے بوجھ سے بچنے کے لئے تمام پرنسپل اکاؤنٹنگ افسران ، ڈی ڈی اوز یوٹیلٹی بلوں کی ادائیگی مقررہ وقت کے اندر یقینی بنائیں گے ۔ سرکاری محکموں ، دفتروں یا بنگلوں میں لگائے گئے ٹیلیفون سے مجاز حد سے زیادہ کوئی کال نہیں کی جائے گی اور سٹیشنری کے استعمال میں بچت کی جائے گی ۔ تمام محکموں ، دفاترمیں کاغذ کے دونوں طرف لکھائی کی جائے گی ۔ ۔ تمام غیر مجاز گاڑیوں کا استعمال روکا جائے گا اور ناقابل استعمال گاڑیوں کو فوراًمحکمہ انتظامیہ کے سپرد کیا جائے گا ۔ سڑکوں اور عمارات کی ایم اینڈ آر کی مدمیں فنڈز کا استعمال حسب ضرورت کیا جائے گا اور غیر ضروری اخراجات کی حوصلہ شکنی کی جائے گی ۔ مقامی جنرل ڈیوٹی کے لئے 1000سی سی سے بڑی کسی گاڑی کے استعمال پر پابندی ہو گی ۔ مزید برآں حکومت نے مالی سال 2015-16کے لئے کفایت شعاری کے ان اقدامات پر بھر پور طریقے سے عمل درآمد یقینی بنانے کی ہدایت کی ہے ۔ اس امر کا اعلان ایک سرکاری اعلامیے میں کیا گیا ۔