لاہور(نیوزڈیسک)چےئرمےن تحریک انصاف کے پولیٹیکل ایڈوائزر عبدالعلیم خان نے کہا ہے کہ ون مین شو کے تحت ہٹ دھرمی اور ذاتی ضد پر مبنی اورنج لائن ٹرین درحقیقت غریبوں سے چھت چھین رہی ہے کچی آبادیوں سمیت این اے122کا علاقہ اس منصوبے سے سب سے زیادہ متاثر ہو گا اور دو دو مرلے کے جن گھروں کو ماضی میں ہماری کوششوںسے مالکانہ حقوق ملے تھے انہیں ایک منصوبے کی بھینٹ چڑھانا نادانی اور زیادتی ہے جس پر تحریک انصاف بھر پور آواز بلند کرے گی۔عبدالعلیم خان نے کہا کہ 21ویں صدی میں صوبہ پنجاب کے سب سے بڑے شہر لاہور کو پینے کا صاف پانی بھی مہیا نہ ہونا بہت بڑا المیہ ہے جبکہ تعلیم ،صحت اور امن و امان کا پہلے ہی بیڑہ غرق ہو چکا ہے ۔انہوں نے کہا کہ گڈ گورننس کے نام پر پنجاب کو تختہ مشق بنایا جا رہا ہے اور بالخصوص اورنج لائن ٹرین کا منصوبہ بہت بڑا سوالیہ نشان ہے ۔ پی ٹی آئی کے پی پی147سے ایم پی اے محمد شعیب صدیقی نے اورنج لائن ٹرین منصوبے کے خلاف اظہار خیال کرتے ہوئے کہا کہ ریلوے کالونیوں کو مسمار کرنے کے فیصلے پر نظر ثانی کی جائے ورنہ عوام جگہ جگہ احتجاج کرنے پر مجبور ہوں گے ،انہو ں نے کہاکہ 11اکتوبر کے ضمنی الیکشن میں نواز لیگ نے ریلوت ملازمین سے ووٹ حاصل کرنے کےلئے انہیں سہانے خواب دکھائے لیکن اب اس کے برعکس غریب آدمی سے زندہ رہنے کا حق چھینا جا رہا ہے اور بھاری کمیشن والے منصوبوں پر غریب آدمی کی قربانی دی جا رہی ہے ۔