گوجرخان (نیوزڈیسک)معروف ٹی وی اینکرریحام خان نے کہا ہے کہ چند فیصد اشرافیہ نے پورے ملک کو یرغمال بنا رکھا ہے ،سیاسی پارٹیوں میں چند خاندانوں کی جارہ داری ہے حکمران جماعت ووٹوں کے لحاظ سے بڑی پارٹی ہونے کے باوجود عوامی مسائل حل کرنے میں ناکام ہے ، عوام کاقصور صرف یہ ہے کہ وہ انہیں ووٹ دیتے ہیں۔ وہ گزشتہ روز یہاں جینٹری گرلز کالج میں منعقدہ تقریب تقسیم انعامات سے خطاب کررہی تھیں اس موقع پر سابق خاتون اول بیگم نصرت پرویز اشرف ،ڈائریکٹر جینٹری کالج راجہ محمد حاشر ، وائس پر نسپل راجہ محمد عمیر اور میڈم نادیہ نورین نے بھی خطاب کیا ملک کے نامور مزاح نگار شاعر سید سلمان گیلانی نے اپنا کلام پیش کرکے طالبات سے خوب داد وصول کی۔ ریحام خان نے کہا کہ خواتین باصلاحیت بھی ہیں اور مردوں کے مقابلے میں عددی اعتبار سے بھی زیادہ ہیں اسی لئے خواتین کو اپنی طاقت منوانے کیلئے اپنا بھرپور کردار ادا کرنا چاہیے اللہ نے مردوں اور عورتوں کو یکساں زبان عطا کی عورتوں کو اپنی زبان سے اپنے حقوق کیلئے جنگ لڑنا ہوگی انہوں نے کہا کہ کسی دوسرے کے لکھے ہوئے کو یاد کرنا تعلیم نہیں تخلیقی صلاحیتوں کو بروئے کار لانا ،سوچنا اور سوچ کر مشکلات کا حل تلاش کرنا تعلیم ہے ،ڈرون اٹیک کا بٹن دبانے کیلئے صرف انگلی درکار ہوتی ہے وہ انگلی خواہ مرد کی ہویا عورت کی ،ڈرون اٹیک ہوجاتا ہے ریحام خان نے کہا کہ مردوں کے مقابلے میں خواتین زیادہ معاملہ فہم ہوتی ہیں کیونکہ خواتین کو ہمیشہ معاملہ فہمی کا درس دیا جاتا ہے انہوں نے کہا کہ پاکستانیوں کا مسئلہ یہ ہے کہ ہم پاکستان کو برا بھلا کہتے ہیں کھڑکی سے کوڑا باہر پھینکتے ہیں تو یہ محسوس کرتے ہیں کہ گندگی بہت زیادہ ہے اگر ہر فرد اپنی ذمہ داری کا احساس کرتے ہوئے کوڑا کرکٹ باہر نہ پھینکے تو پاکستان سے گندگی کا خاتمہ ہوجائے ،چھوٹی چھوٹی باتوں سے بڑی بڑی تبدیلیاں رونما ہوسکتی ہیں ہم کسی کے متعلق غلط بات نہ کہے خواتین کا اصل مسئلہ یہ ہے کہ وہ اپنی دشمن خود ہیں ایک دوسرے کی ٹانگیں کھینچنے کی بجائے ایک دوسرے کو سپورٹ کریں اگر خواتین خودکو مظلوم سمجھنے لگیں گی تو ان پر روز ظلم ہوگا ،ہمیں یہ بات یاد رکھنا چاہیے کہ ہمارے مسائل کوئی نہیں حل کرے گا بلکہ ہمیں خود اپنے مسائل کے حل کیلئے جدوجہد کرنا ہوگی ،اللہ نے ہمیں ماں ،بہن ،بیٹی ،بیوی کی صورت میں عزت دی ہے ہمیں اللہ کی دی ہوئی عزت کا خیال رکھنا چاہیے تقریب سے خطاب کرتے ہوئے بیگم نصرت پرویز اشرف نے کہا کہ اسلام ہمیں مشکلات کا مقابلہ کرنے کیلئے اخلاق کا مظاہرہ کرنے کا درس دیتا ہے ،نبی پاکؐ کے اسوہ حسنہ سے بھی مسلمانوں کو اعلیٰ اخلاق کی تعلیم ملتی ہے ،پاکستان میں دہشت گردی کے بڑے واقعات ہورہے ہیں دہشت گردی کے خاتمے کیلئے فروغ علم انتہائی ضروری ہے ،علم کی شمعیں روشن کرنے والے پیغمبرانہ کردار ادا کررہے ہیں انہوں نے جینٹری کالج کے بہترین سسٹم کو سراہا۔
Back to Conversion Tool