اسلام آباد(نیوزڈیسک)وزیراعظم میاں نواز شریف نے گزشتہ روز غریب لوگوں کے مفت علاج معالجے کیلئے جس قومی صحت پروگرام کا آغاز کیا اس کو شروع کرنے اور آگے بڑھانے کے پیچھے وزیراعظم کی صاحبزادی مریم نواز کی سوچ اور کوششیں شامل تھیں۔ ذرائع کا کہنا ہے کہ وزیراعظم نے نیشنل ہیلتھ پروگرام شروع کرنے کا فیصلہ مریم نواز کے کہنے پر کیا تھا۔ نیشنل ہیلتھ پروگرام کی تشکیل سمیت اس کی مکمل منصوبہ بندی اور لانچنگ تقریب تک تمام مراحل میں مریم نواز کی کوششیں اور محنت شامل تھیں وہ اس پروگرام کے ذریعے نہ صرف ملک کے غریب و نادار لوگوں کو مفت صحت کی سہولت کی فراہمی کی خواہشمند ہیں بلکہ وہ پاکستان کو حقیقی معنوں میں ایک فلاحی مملکت کی راہ پر گامزن دیکھنا چاہتی ہیں۔ ذرائع کا کہنا ہے کہ اگر مریم نواز کی ذاتی سوچ اور حقیقی لگن شامل نہ ہوتی تو یہ پروگرام ہرگز منزل مقصود تک نہ پہنچتا۔ یہ پروگرام پندرہ اضلاع میں شروع کیا جا رہا ہے اگلے مرحلے میں اسے تئیس اضلاع تک توسیع دی جائے گی۔ پروگرام کے تحت ابتدائی طور پر کارڈ رکھنے والے تقریباً بارہ لاکھ خاندان سرکاری اور نجی ہسپتالوں میں مفت علاج معالجے کی سہولت حاصل کر سکیں گے۔ مفت علاج معالجے کی یہ سہولیات سات مہلک بیماریوں میں مبتلا مریضوں کو فراہم کی جائیں گی جن میں ذیابیطس، کینسر اور جگر کی خرابی شامل ہے جبکہ اس پروگرام کے تحت مہلک بیماری میں مبتلا ہر مریض کو تین لاکھ روپے دیئے جائیں گے تاہم ضرورت پڑنے پر علاج معالجے کیلئے اضافی رقم بیت المال فراہم کرے گا۔