لندن۔۔۔۔نوجوانوں میں انتہائی مقبول میسجنگ سروس واٹس ایپ نے اب موبائل فونز کی دنیا سے نکل کر انٹرنیٹ میں قدم رکھنے کا فیصلہ کرلیا ہے۔اس حوالے سے اطلاعات اس وقت سامنے آئی جب واٹس ایپ کی حریف میسجنگ اپلیکشن ٹیلیگرام کے بانی پیرول ڈورو نے یہ بیان جاری کیا کہ انہیں لگتا ہے کہ واٹس ایپ نے اپنے ویب ورڑن میں کام شروع کردیا ہے۔اگرچہ واٹس ایپ نے باضابطہ طور پر اپنی اس مقبول ترین میسجنگ اپلیکشن کے ویب ورڑن کا اعلان نہیں کیا تاہم کمپیوٹر ماہرین نے دریافت کیا ہے کہ حالیہ اپ ڈیٹس میں ایک کوڈ چھپا ہوا ہے جس میں ” واٹس ایپ ویب” کا ذکر موجود ہے۔
اس کوڈ میں ویب کے ساتھ ساتھ یہ بھی ذکر کیا گیا ہے کہ کس طرح واٹس ایپ کے ویب ورڑن میں لاگ ان ہوا جاسکتا ہے۔ماہرین کا کہنا ہے کہ یہ بہت زیادہ ٹھوس ثبوت تو نہیں مگر اس سے یہ ضرور ثابت ہوتا ہے کہ واٹس ایپ کی ٹیم ویب میں فعال ہونے کے لیے کچھ کام ضرور کررہے ہیں۔چھ سو ملین سے زائد صارفین کے ساتھ واٹس ایپ سب سے بڑی میسجنگ سروس ہے جس نے تاحال ویب ورڑن کو متعارف نہیں کرایا ہے اور اسے صرف موبائل فونز پر ہی استعمال کیا جاسکتا ہے۔