لاہور(نیوزڈیسک ) چیئرمین پاکستان تحریک انصاف عمران خان کے انٹرا پارٹی انتخابات کے اعلان کے بعد پارٹی رہنماﺅں اور کارکنوں نے جوڑ توڑ شروع کر دیا۔ اس سلسلہ میں گزشتہ روز لاہور، گوجوانوالہ، سیالکوٹ، ملتان، قصور، شیخوپورہ سمیت پنجاب بھر سے تعلقات رکھنے والے کارکنوں نے گزشتہ روز پنجاب اسمبلی میں اپوزیشن لیڈر اور تحریک انصاف پاکستان کے مرکزی رہنما میاں محمودالرشید سے انکے دفتر میں ملاقات کی اور انکی ہر طرح کی حمایت کا اعلان کیا۔ اس موقع پر میاں محمودالرشید نے کارکنان سے گفتگو کرتے ہوئے کہا کہ تحریک انصاف پاکستان کی واحد سیاسی جماعت ہے جومسلسل دوسری مرتبہ اپنی جماعت میں انتخابات کرانے جا رہی ہے ۔انہوں نے کہاکہ پارٹی میں انتخابات کرانے کے اعلان نے یہ بات ثابت کر دی ہے کہ عمران خان نہ صرف ملک بلکہ اپنی جماعت میں بھی حقیقی جمہوریت چاہتے ہیں۔ محمود الرشےد نے مزےد کہاکہ کارکنان پارٹی انتخابات کی تیاری کریں اور ممبر سازی مہم کے سلسلے میں گلی محلوں کی سطح پر کیمپ لگائیں۔ دریں اثناءملتان روڈ کے تاجروں سے ملاقات میں اپوزیشن لیڈر میاں محمودالرشید نے کہا کہ خادم اعلی© پنجاب صوبے کے عوام کے حال پر رحم کھائیں یہاں ہسپتالوں اورتعلیمی اداروں کی صورتحال ناگفتہ بہ ہے، مناسب طبی سہولیات کی عدم فراہمی کے باعث غریب مریض مر رہے ہیں ، لیکن حکومت پنجاب تمام فنڈز اورنج ٹرین منصوبے پر خرچ کرنے جارہی ہے۔انہوںنے کہاکہ تحریک انصاف ملک کی تعمیروترقی کی حامی ہے لیکن اسکا مطلب یہ نہیں کہ عوام کو تعلیم، صحت، صاف پانی ، انصاف کی فراہمی کی بجائے تمام وسائل صرف سڑکوں پر لگادیئے جائیں۔ اورنج ٹرین منصوبے کے متاثرین سے گفتگو کرتے ہوئے میاں محمودالرشید نے کہا کہ کسی تاجر اور ملتان روڈ پر بسنے والے شہریوں کے ساتھ نا انصافی نہیں ہونے دیں گے۔ انہوں نے کہا کہ تحریک انصاف عوام کو کبھی تنہا نہیں چھوڑے گی۔