اسلام آباد(نیوز ڈیسک )موت کا وقت کسی کو معلوم نہیں لیکن جدید سائنس نے انسانی صحت کے متعلق کچھ اہم معلومات حاصل کرنے اور جسم میں ہونے والی تبدیلیوں کو سمجھنے میں بڑی کامیابیاں حاصل کرلی ہیں۔ سائنسدانوں کا کہنا ہے کہ اگرچہ موت کے دن کے بارے میں کچھ نہیں کہا جاسکتا لیکن جینز کے مطالعے سے دن کے اس پہر کا اندازہ ضرور لگایا جاسکتا ہے جس میں موت کا امکان سب سے زیادہ ہوتا ہے۔سائنسی جریدے Annals of Neurology کے نومبر 2012ءکے شمارے میں شائع ہونے والی ایک تحقیق میں بتایا گیا کہ جن لوگوں میں ایک خاص جین AA پایا جاتا ہے ان کے مرنے کا سب سے زیادہ امکان دن 11 بجے ہوتا ہے۔ یہ جین دل کے دورے اور فالج جیسی بیماریوں کے ساتھ گہرا تعلق رکھتا ہے اور اس کے حامل افراد میں صبح جلد بیدار ہونے کی عادت بھی پائی جاتی ہے۔ اس تحقیق میں 65 سال عمر کے 1200 افراد کا مطالعہ کیا گیا، جن میں سے AAجینز رکھنے والوں کی اکثریت کی موت 11 بجے کے قریب ہوئی۔