کراچی(این این آئی)فیروز آباد کے علاقے طارق روڈ، اللہ والا چورنگی کے قریب موٹر سائیکل سوار مسلح ڈاکو جیولر کے ملازمین سے کروڑوں روپے مالیت کا 82 تولے سونا اور 4 کلو چاندی لوٹ کر فرار ہوگئے۔

تفصیلات کے مطابق واردات کی اطلاع ملتے ہی پولیس موقع پر پہنچ گئی۔ ایس ایس پی ڈسٹرکٹ ایسٹ زبیر نواز شیخ نے بتایا کہ ابتدائی تفتیش کے دوران جیولر کی جانب سے پولیس کو بیان دیا گیا ہے کہ ان کے ملازمین صدر سے 82 تولے سونا اور 4 کلو چاندی لے کر طارق روڈ پر واقع دکان جا رہے تھے کہ اللہ والا چورنگی کے قریب موٹر سائیکلوں پر سوار ملزمان نے انہیں روک کر قیمتی سامان چھین لیا اور فرار ہوگئے۔ایس ایچ او فیروز آباد انعام جونیجو کے مطابق موتی والا جیولرز کے ملازمین صدر سے شاپر میں سونا اور چاندی لے کر آ رہے تھے کہ طارق روڈ، شارع قائدین سروس روڈ پر تعاقب کرنے والے ڈاکوؤں نے واردات کی۔

پولیس جائے وقوعہ کے اطراف سے سی سی ٹی وی فوٹیجز حاصل کر رہی ہے، جن کی مدد سے ملزمان کی شناخت اور فرار کے راستوں کا تعین کیا جائے گا۔ پولیس کے مطابق واقعے کی مزید تفتیش جاری ہے۔