پشاور(این این آئی)دیر کالونی پشاور میں نجی سکول کی عمارت گرنے کے واقعے میں ایک ہی خاندان کے پانچ افراد بھی زندگی کے بازی ہار گئے ،

پانچوں بچے آپس میں قریبی رشتے دار تھے۔دیر کالونی کے رہائشی منگل خان نے بتایا کہ اس حادثے میں اس کا 9 سالہ بچہ عامر خان جبکہ اس کی بھتیجی رومیسا جاں بحق ہوگئی، جاں بحق عامر اور رومیسہ دونوں اسی سکول میں پڑھ رہے تھے۔بچی کے چچا نے بتایا کہ اس کے دیگر تین رشتہ دار بھی اس حادثے میں جاں بحق ہوئے ہیں ۔

انہوں نے بتایا کہ سکول کی عمارت جب گرگئی تو انہیں اطلاع ملی اور وہ امدادی کاموں میں حصہ لینے کیلئے پہنچ گئے تاہم کچھ دیر بعد انہیں اطلاع ملی کہ اس کے گھر کے بچے ہسپتال میں ہیں اور وہ جاں بحق ہوگئے ہیں۔انہوں نے کہا کہ جاں بحق بچوں کی اجتماعی نماز جنازہ ادا کردی گئی ہے اس حادثے نے ان کی ہستے بستے گھر کو اجاڑ دیا۔