اسلام آباد (نیوز ڈ یسک)وفاقی حکومت نے قومی بچت کی مختلف اسکیموں میں سرمایہ کاری کرنے والوں کے لیے منافع کی شرح میں اضافہ کردیا ہے،

وزارت خزانہ نے اس حوالے سے نظرثانی شدہ شرحوں کا باقاعدہ نوٹیفکیشن جاری کردیا۔نئی شرحوں کے تحت اسپیشل سیونگز سرٹیفکیٹ پر منافع میں 74 بیسس پوائنٹس تک اضافہ کیا گیا ہے، جس کے بعد اس اسکیم پر سرمایہ کاروں کو 11.82 فیصد منافع حاصل ہوگا۔وزارت خزانہ کے نوٹیفکیشن کے مطابق ڈیفنس سیونگز سرٹیفکیٹ کی شرح منافع میں 19 بیسس پوائنٹس کا اضافہ ہوا ہے، جس کے بعد نئی شرح 11.80 فیصد مقرر کردی گئی ہے۔اسی طرح بہبود سیونگ سرٹیفکیٹ اور پنشن سرٹیفکیٹ پر منافع کی شرح 12 بیسس پوائنٹس بڑھائی گئی ہے۔ اضافے کے بعد دونوں اسکیموں کے لیے نئی شرح منافع 12.72 فیصد ہوگئی ہے۔ریگولر انکم سرٹیفکیٹ میں بھی نمایاں اضافہ کیا گیا ہے۔

اس اسکیم کی شرح منافع 60 بیسس پوائنٹس بڑھا کر 11.76 فیصد مقرر کی گئی ہے۔اسلامک سیونگ اسکیموں میں سروا اسلامک ٹرم اکاؤنٹ کے مختلف دورانیوں کی شرح منافع میں بھی نظرثانی کی گئی ہے۔ تین سالہ پلان پر منافع 41 بیسس پوائنٹس بڑھنے کے بعد 11.57 فیصد ہوگیا ہے۔نوٹیفکیشن کے مطابق سروا اسلامک ٹرم اکاؤنٹ کے پانچ سالہ پلان کی شرح منافع میں 54 بیسس پوائنٹس کا اضافہ کیا گیا، جس کے بعد اس اکاؤنٹ پر نئی شرح 11.70 فیصد مقرر کردی گئی ہے۔وزارت خزانہ کی جانب سے جاری کردہ نئی شرحیں قومی بچت کی متعلقہ اسکیموں میں سرمایہ کاری کرنے والے افراد کے لیے قابلِ اطلاق ہوں گی۔