چکوال(نیوزڈیسک)وزیراعلیٰ شہبازشریف نے کہاہےکہ بلدیاتی انتخابات کے نتائج نے مسلم لیگ ن کی عام انتخابات میں بھاری اکثریت کی توثیق کردی ہے، کسی کرپٹ یا سفارشی کو مقامی حکومتوں میں عہدہ نہیں دیاجائےگا۔وزیراعلیٰ پنجاب شہباز شریف نے سہگل آباد ضلع چکوال میں الف نون پیرنٹس فاؤنڈیشن کے زیراہتمام جدید سہولتوں سے آراستہ ہائی اسکول کاافتتاح کیا۔انہوں نے کہاکہ چکوال کے ارکان اسمبلی اور مخیر حضرات ملک اشرف نوابی کی طرح تعلیم اور صحت کے ادارے قائم کرنے کے لیے آگے آئیں۔وزیر اعلیٰ پنجاب کا کہنا تھا کہ بلدیاتی الیکشن میں عوام نے ن لیگ کی قیادت پر بھرپوراعتماد کا اظہار کیاہے، اس کی لاج رکھیں گے،کسی کرپٹ کو برداشت نہیں کروں گا،چیئرمین یا نائب چیئرمین کاعہدہ کسی سفارشی کونہیں لینے دوں گا۔وزیراعلیٰ نے کہاکہ’’خادم پنجاب دیہی روڈز پروگرام‘‘ کے تحت 2018 ءتک دیہی علاقوں میں سڑکوں کی تعمیرو بحالی کے لیے 150 ارب روپے خرچ کیے جائیں گے، ساڑھے 3 کروڑ سے زائد لوگوں کو پینے کے صاف پانی کی فراہمی کے لیے 70 ارب روپے خرچ کیے جائیں گے۔ اس موقع پر کپس ہائی اسکول تعمیر کرنے والی شخصیت اشرف نوابی نے کہاکہ آج ان کا خواب پورا ہوگیا۔سہگل آباد میں کپس اسکول کی پرشکوہ عمارت کے ساتھ ایک خوبصورت مسجد اور لائبریری بھی تعمیر کی گئی ہے،اسکول میں مختلف ممالک سےماہر اساتذہ آئیں گے۔